Danııalyq Novo Nordisk kompanııasy qurylǵannan beri qant dıabetin, semizdikti jáne basqa sozylmaly aýrýlardy emdeýge arnalǵan ınsýlın jáne «Ozempık», «Vıktoza» sııaqty birqatar dári-dármekti shyǵarýǵa mamandandyrylǵan.
Memorandýmǵa qol qoıý rásiminde mınıstr qant dıabetine qosa, negizgi áleýmettik mańyzy bar ınfeksııalyq emes aýrýlardyń aldyn alý men basqarýdy jetildirý, sondaı-aq Qazaqstannyń farmasevtıkalyq salasyn odan ári damytýda osy áriptestiktiń mańyzdylyǵyn atap ótti.
«Búgingi memorandým aıasynda qol jetkizilgen ýaǵdalastyqtar bizdiń densaýlyq saqtaý salasyndaǵy ekijaqty yntymaqtastyǵymyzǵa qosymsha serpin beredi dep úmittenemin», dedi A.Ǵınııat.
О́z kezeginde TMD damýshy elderi óńiriniń, «Novo-Nordısk Qazaqstan» JShS bas menedjeri Alı Bengı josparlanǵan is-sharalardy tolyq jáne sapaly júzege asyrýda jan-jaqty qoldaý kórsetýge daıyn ekenin bildirdi.
Memorandýmǵa sáıkes taraptar ekijaqty yntymaqtastyqty birneshe baǵytta damytýdy kózdep otyr. Atap aıtqanda: dárilik zattardyń otandyq óndirisin qoldaý jáne damytý; dıabet jáne semizdik salasynda úzdiksiz medısınalyq bilim berý boıynsha jobalardy iske asyrý arqyly sapaly medısınalyq kómek kórsetýdi jetildirý maqsatynda kadrlyq áleýetti nyǵaıtý; ǵylymı jáne zertteý áleýetin arttyrý; ınnovasııalyq ádisterge erterek qol jetkizý arqyly qant dıabeti jáne semizdikpen aýyratyn naýqastar úshin emdeý sapasyn arttyrý.
Mysaly, Novo Nordisk kompanııasy semizdiktiń aldyn alý jáne emdeý máselelerimen aınalysatyn qazaqstandyq mamandarǵa «Global obesity clinics programme» baǵdarlamasy boıynsha oqýǵa múmkindik beredi. Sondaı-aq kompanııa qazaqstandyq farmasevtıkalyq kásiporyndardyń adam ınsýlıni preparattaryn óndirýdi odan ári jolǵa qoıýy úshin belsendi farmasevtıkalyq sýbstansııany bizdiń naryqqa jetkizýdi júzege asyrý múmkindigin zerdeleýdi josparlap otyr.
Dúnıejúzilik dıabet federasııasynyń (IDF) derekteri boıynsha 2021 jyly qant dıabetiniń jahandyq taralýy 10,5%-dy (573 mln adam) qurady jáne 2030 jylǵa qaraı 11,3%-ǵa, 2045 jylǵa qaraı 12,2%-ǵa (783 mln adam) deıin ulǵaıý boljanyp otyr.
Qazaqstanda «Qazaqstan Respýblıkasy úshin dıabettiń aýyrtpalyǵy» zertteýine sáıkes, osy aýrýmen aýyratyn naýqastardyń sany 383 myńdy quraıdy jáne turaqty túrde ósýde.
