О́ńirlerde halyqpen júzdesti

Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń hatshysy Aqylbek Kúrishbaev Almaty oblysyna jumys sapary barysynda Qonaev qalasynda bolyp, energetıka, kásipkerlik, aýyl jáne balyq sharýashylyǵy salasyndaǵy nysandardy aralady. Senator «LST Agro» jylyjaı kesheniniń jumysymen jáne ónim óndirý úrdisimen tanysty. Ol osy óńirde aýyl sharýashylyǵyn damytýǵa baǵyttalǵan baǵdarlama júzege asyp jatqanyn aıta kelip, aımaqtyń tabıǵaty kókónis daqyldaryn ósirý úshin óte qolaıly ekenin jáne salaǵa jańa serpin berý qajetin atap ótti.

Aqylbek Kúrishbaev óńirdegi «Os­panova Development» JShS balyq sharýashylyǵy kesheninde de boldy. Ol balyq ónimderiniń ımportyn qysqartýǵa jáne ınnovasııalyq jobany iske asqannan keıin eksport kólemin ulǵaıtýǵa múmkindik beredi. Senator sondaı-aq Ile ózeniniń Qapshaǵaı shat­qalynda ornalasqan sý-energetıka ká­siporny jumysymen tanysty.

Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń depýtattary Dúı­sen­ǵazy Mýsın, Muhtar Jumaǵazıev, Ábdá­li Nuralıev jáne Sultan Dúısem­bınov Shyǵys Qazaqstan oblysyna bardy.

Senatorlar jumys sapary bary­synda Ulan aýdanyndaǵy «OST Fish» JShS balyq sharýashylyǵynyń qyz­metimen tanysty. Balyq sharýa­shy­lyǵynyń basshylary bekire balyq­taryn ósirý men azyqtandyrýdyń erek­shelikteri, ýyldyryq ósirý men alý­dyń tehnologııalyq prosesi týraly senatorlardy habardar etti. Parlamentshiler sonymen qatar Altaı óńirindegi agroónerkásip kesheniniń kásip­oryndary men aımaqtaǵy fer­mer­lik sharýashylyqtardy aralap, aýyl sharýashylyǵy tehnıkasy parkiniń jaı-kúıin kórip shyqty. Senatorlar aýdan­nyń elimizdiń agrarlyq sektory men aýyl sharýashylyǵy óndirisin damy­týǵa qosqan úlesin joǵary baǵalady.

Narıman Tóreǵalıev pen Lázzat Rysbekova Batys Qazaqstan oblysy Terekti aýdanyndaǵy Dolınnoe, Alǵa­bas, Terekti aýyldarynyń turǵyn­darymen kezdesti. Depýtattar elimizde júrgizilip jatqan reformalardy zańnamalyq qamtamasyz etý jumys­tary týraly habardar etti. Dolınnoe jáne Alǵabas aýyldary turǵyndary áleý­mettik nysandardy gazdandyrý, bala­baqsha ǵımaratyn kúrdeli jóndeý, aýyl­ǵa aýyz sý tartý máselesin qozǵady. Sena­torlar aýdan ortalyǵynyń turǵyn­darymen kezdesýde aýdandyq emhana men kópqabatty turǵyn úılerdiń quryly­syn tal­qylady. Jańa ómir aýyly turǵyn­dary úı qurylysyna arnalǵan jer telimderine elektr jelilerin qosýǵa, mádenıet úıiniń qurylysyn aıaqtaýǵa jáne qosymsha jedel járdem kóligin bólýge kómektesýdi surady.

Narıman Tóreǵalıev pen Lázzat Rysbekova Bórli aýdanyna da atbasyn burdy. Senatorlar Jarsýat, Prıýralnoe jáne Oblavka aýyl­darynyń turǵyndarymen kezdesýde aýyz sý, jer qatynastary, kenti­shilik joldardy jóndeý, elektr jeli­leriniń tozýy, Oblavka aýylynda feld­sherlik-akýsherlik pýnkt pen mektep salý máselelerin talqylady. Depýtat­tar aýyldaǵy ózekti máseleler tıisti sharalar qabyldaý úshin ýákiletti mem­lekettik organdardyń nazaryna jet­kiziletinin atap ótti. Parlamentshiler sonymen qatar qus jáne eginshilikpen aına­lysatyn «Jarsýat» JShS qyz­metimen, mektep pen jelkendi antenna qurylysynyń barysymen tanysty. Depýtattar sondaı-aq Amangeldi – Ýspenskaıa já­ne Podstepnoe – Fedo­rovka – Reseı Fede­rasııasy shekarasy joldarynyń qu­rylysyn sapaly salý qajettigin atap ótti.

Lázzat Súleımen Jetisý oblysyna jumys sapary barysynda Sarqan jáne Alakól aýdandarynda bolyp, jergilikti halyqpen jáne ákimdikteriniń ókil­derimen kezdesti. Senator Sarqan aýdanynyń ókilderimen kezdesýde aýyl sharýashylyǵy maqsatyndaǵy jerlerdi azamattarǵa ýaqytsha paıdalanýǵa berý, turǵyn úıler men tehnıkalyq jáne kásiptik bilim berý uıymdarynyń ǵımarattaryn kúrdeli jóndeýge qarjy bólý máselelerin talqylady. Al aýdan turǵyndarymen kezdesýde bos turǵan «Qazposhta» AQ ǵımaratyn jastar sport seksııasyn ashý úshin aýdan­dyq kommýnaldyq menshikke berý, jaıylymdyq jáne sýarmaly jerlerdi bólý, qoqys jınaý jáne qaıta óńdeý, medısınalyq kómek kórsetý jáne áleýmettik qoldaý máseleleri kóterildi. Depýtat Alakól aýdanynda «Dıp­lommen aýylǵa» jáne «Aýyl – el besigi» baǵdarlamalarynyń júzege asýy jáne mádenıet úıiniń salyný ba­rysymen, sondaı-aq oblystyń shalǵaı aýyldaryndaǵy sharýa qojalyq­tarynyń qyzmetimen tanysty.

Senatorlar Nurlan Beknazarov pen Aıgúl Qapbarova Shymkent qalasyna sapary barysynda qaıta jóndeýden ótken «Metallýrg» stadıonynda bolyp, atqarylyp jatqan jumystardyń barysymen tanysty. Zamanaýı stadıonda ákimshilik ǵımarat, ashana, komandalyq oıyndarǵa arnalǵan sport zaldary, sporttyq trenajerlar men oıyn alańdary qarastyrylǵan. Jobalyq josparǵa sáıkes, «Metallýrg» stadıonyn qaıta jóndeý jumystary aǵymdaǵy jyldyń jeltoqsan aıynda aıaqtalady dep josparlanýda. Se­natorlar sondaı-aq jergilikti máslıhat depýtattarymen kezdesip, senatqa Shymkent turǵyndarynan kelip túsken ótinishterdi talqylady.

Senat depýtaty Andreı Lýkın Nur-Sultan qalasy polısııa departamentiniń jergilikti polısııa qyzmeti basqarmasy men qalalyq ákimdiktiń «Qamqor» áleýmettik qyzmet kórsetý ortalyǵy» KMM-de bolyp, basqarma jáne ortalyq qyzmetkerlerimen kezdesti. Jergilikti polısııa qyzmeti basqarmasynyń bas­shylyǵy men qyzmetkerleri senatorǵa quqyq buzýshylyqtardyń aldyn alý, qoǵamdyq tártipti saqtaý, jol qozǵalysy qaýipsizdigin qamtamasyz etý, qylmystyq jáne ákimshilik quqyq buzýshylyqtardyń jolyn kesý jóninde júrgizilip jatqan jumystar týraly aıtyp berdi. Andreı Lýkın óz kezeginde Palatanyń zańnamalyq jumysy týraly kezdesýge qatysýshylardy jan-jaqty habardar etti.  Depýtat sonymen qatar «Qamqor» ortalyǵynda kórsetiletin qyzmettermen, onyń materıaldyq jáne tehnıkalyq jabdyqtalýymen
tanysty.