SQO sybaılas jemqorlyqqa qarsy qyzmet kóliktik baqylaý ınspeksııasy avtokólikte baqylaý bóliminiń eki bas mamanyna qatysty qylmystyq isti qarady. Kólik ınspektorlary 100 myń teńge paramen ustalǵan edi.
Eske sala keteıik, byltyr oblystyń kóliktik baqylaý ınspeksııasynyń Baızaq jáne Sársenov degen eki bas mamany Petropavl-Mamlıýtka avtojolynyń kólik basqarý pýnktine táýliktik aýysymǵa túsken. Jumys barysynda olar jaýapkershiligi shekteýli seriktestikterdiń birine tıesili tranzıttik Kamazdy toqtatyp, 100 myń teńge para talap etken. Sol úshin ınspeksııa mamandary júk kóliginiń kedergisiz júrip-turýyna jaǵdaı jasamaq bolǵan.
Qylmystyq is aıyptalýshylardyń kinásin tolyq moıyndaýyna baılanysty jedeldetilgen tártipte ótti.
Petropavl qalalyq soty 8 sáýir kúni Baızaq jáne Sársenovty memlekettik qyzmette ómir boıyna qyzmet atqarý quqyǵynan aıyra otyryp, 6 jylǵa bas bostandyǵynan aıyrdy.
SQO Sybaılas jemqorlyqqa qarsy qyzmet basshysynyń birinshi orynbasary Nurlan Jahınniń aıtýynsha, kóliktik baqylaý ınspeksııasynda sybaılas jemqorlyqpen kúres tıisti deńgeıde jolǵa qoıylmaǵan. Saldarynan bul vedomstvonyń mamandary jyl saıyn paramen ustalyp keledi. 2020 jyly Muqanov 3 jylǵa, 2021 jyly osy Muqanovtyń tikeleı bastyǵy Maǵzumov 5 jylǵa bas bostandyǵynan aıyryldy.
«Sotqa deıingi tergeý barysynda kóliktik baqylaý ınspeksııasynyń qyzmetkerleri jyljymaly baqylaý pýnktterinde kezekshilik atqarý kezinde beıneojetondy nemese mobıldik zııatkerlik baqylaý quralyn paıdalanbaıtyndyǵy anyqtaldy.
Osylaısha qyzmetkerlerdiń áreketteri (áreketsizdigi) aýdıo, beınejazba arqyly tirkelmeıdi. Kóliktik baqylaý ınspeksııasy basshylyǵy jáne arnaıy quraldar arqyly onlaın rejıminde qyzmetkerlerdiń jumysyna monıtorıngti júzege asyratyn Komıtettiń ahýaldyq ortalyqtary kezekshileri tarapynan baqylaýdyń tolyq bolmaýy qylmystyq quqyq buzýshylyqtardy jasaýǵa sebep bolǵan. Júıeli túrde jasalyp kelgen sybaılas jemqorlyqty joıý úshin birneshe usynymdar berildi», deıdi Nurlan Jahın.
Usynysty qaraý nátıjeleri boıynsha óziniń laýazymdyq mindetterin tıisinshe oryndamaǵany úshin kóliktegi baqylaý bóliminiń bas mamany V. Morozov sógis túrinde tártiptik jaýapkershilikke tartyldy.
Qaramaǵyndaǵy qyzmetkerlerdiń jumysyna vedomstvolyq baqylaýdyń joqtyǵy úshin Inspeksııa basshysy R.Seıtalın de sógis túrinde tártiptik jaýapkershilikke tartyldy.
