Bul jarysqa dúnıe júziniń 72 elinen 3 myńnan artyq óner ujymdary qatysyp, 22-31 shilde aralyǵynda óner kórsetken. Keshe jarys aıaqtaldy, al búgin úzdik ujymdardyń konserti bolady. Qazaqstandyqtardyń jeńisin búkil elimiz qýanyshpen atap ótýde. Al soltústikqazaqstandyqtardyń qýa-nyshynda tipti shek joq. Oblys ákimi Qumar Aqsaqalov óziniń «Instagramdaǵy paraqshasynda bylaı dep jazdy: «Bizdiń ujymymyz fınaldyq óner kórsetýlerde AQSh, Irlandııa, Aýstralııa, OAR, Taıland, Kanada, Germanııa sııaqty ataqty elderden kelgen barlyq ujymdy artqa tastap, bas báıgeni jeńip aldy. Bul – barsha Qazaqstan úshin úlken tabys. Men óner ujymynyń árbir múshesin jáne olardyń kórkemdik jetekshisi Olga Rostovshıkovany úlken jeńisimen quttyqtaımyn. Bul – sizderdiń kóp jylǵy tókken ashy terlerińizdiń, talmaǵan eńbekterińizdiń, ónerge degen óshpes mahabbattaryńyzdyń jemisi. Elimizdiń árbir turǵyny sizdermen maqtanady!»
Dúnıejúzilik chempıonatqa ujymdy oblystyq mádenıet basqarmasynyń bastyǵy Dosbol Ábdiraıysov bastap bardy. Olga Rostovshıkova jetekshilik etetin bul ujym bıyl Mysyrdaǵy osyndaı festıvalǵa qatysyp, Horeografııa atalymy boıynsha jeńimpaz bolyp oralǵan. Ujym músheleri – estý qabiletteri tómen jandar. Olar alǵash Petropavldaǵy estý qabileti tómen oqýshylardyń ınternatynda uıymdasqan. Ujym músheleri mektep bitirgen soń jergilikti bılik olardy taratpaý úshin túrli ujymnyń janyna qosqan. Biraq bári de ortaq qazannan aqsha bólýge jaramaı, aqyry S.Muqanov atyndaǵy qazaq sazdy drama teatrynan pana tapqan edi.
Birjan Jalǵasbaev basqaratyn darqan peıildi ortada «Sezimtal» úlken tabystarǵa da jetýde. Al qulaǵy kemis, sóıleı almaıtyn jandarǵa bı úıretýdegi Olga Rostovshıkovanyń eńbegi aıryqsha. Ol óziniń shákirtterine bıdiń elementterin ymmen kórsetip, túsindirip otyrady.
PETROPAVL
