Resmı málimetke súıensek, jergilikti polısııa qyzmetkerlerine Panfılov aýdanyna qarasty Sholaqaı aýyly turǵynynyń atynan kámeletke tolmaǵan qyzynyń joǵalyp ketkeni týraly aryz túsken. 10-synypqa kóshken Quralaı Qısabekova keshkisin aýyldaǵy qurbysyna qonaqqa baryp, úıine qaıtyp oralmaǵan. Atalǵan aryz boıynsha Jetisý óńiriniń polıseıleri qyzdy izdeý jumystaryn júrgizgen. Keshendi jedel-izdestirý is-sharalarynyń nátıjesinde quzyrly organdar onymen jynystyq qatynasqa túsip, isin jasyrý úshin aıýandyqpen óltirgenin moıyndaǵan jergilikti Rýstam Ahmetov esimdi azamatty anyqtaıdy.
Kúdiktiniń aıǵaqtaryn tekserý jáne naqtylaý barysynda jábirlenýshiniń máıiti aýyldyń shetinen tabylǵan, qazir sot-medısınalyq saraptamaǵa jiberildi.
«Qazaqstan Respýblıkasy Qylmystyq kodeksiniń 99-babynyń 2-bóligi (kisi óltirý), 10-tarmaǵy (ózge qylmysty jasyrý maqsatynda) jáne 14-tarmaǵy (kámeletke tolmaǵan adamdy óltirý) boıynsha qylmystyq is qozǵaldy. Qazaqstan Respýblıkasy Qylmystyq kodeksiniń 120-babynyń 3-1-bóligi, 1-tarmaǵy (kámeletke tolmaǵan adamdy zorlaý) boıynsha ómir boıyna bas bostandyǵynan aıyrýǵa deıingi jaza taǵaıyndaldy. Onyń sanksııasynda 17 jylǵa deıin bas bostandyǵynan aıyrý jazasy qarastyrylǵan», deıdi Jetisý oblysy polısııa departamentiniń baspasóz qyzmeti.
Kúdikti ýaqytsha ustaý ızolıatoryna qamaldy, is boıynsha birqatar qajetti saraptama taǵaıyndaldy. Tergeýdi oblystyq polısııa departamentiniń tergeýshileri júrgizip jatyr.
Týystarynyń aıtýynsha, 15 jasar Quralaı 21 shildede úıinen shyǵyp, qaıta oralmaǵan. Máıit araǵa apta salyp, 28 shildede tabyldy. Aıta keteıik, kúdikti buǵan deıin de isti bolǵan eken. Muny Quralaı Qısabekovanyń týysy Kámshat Kópbaeva da aıtyp otyr.
«Osydan bes-alty jyl buryn kámelet jasqa tolmaǵan qyzdy zorlap, sottaldy. Biraq jaza merzimin tolyq ótemeı, tártibine baılanysty bostandyqqa shyqty. Túrmeden bosaǵan soń taǵy bir qyzdy zorlap, qylmystyq jazadan jaltarý maqsatynda, sol qyzǵa úılendi. Endi, mine, bizdiń qyzymyz sol aıýannyń kezekti qurbany bolyp otyr», deıdi K.Kópbaeva.
Eger adam buryn da osyndaı áreketi úshin sottalǵan bolsa, endi týra sol qylmysyn bostandyqqa shyqqan soń qoly qalt etpeı qaıtalasa, «ne úshin jáne kimniń kómegimen merziminen buryn bostandyqqa shyqty eken?» degen saýaldyń týyndaýy anyq.
Qazir áleýmettik jelide alypqashpa áńgimeler jeldeı esýde. Qandy qylmys 4 adamnyń qolymen jasalǵandyǵy týraly buratartpa aqparattar da órip júr. Quzyrly organdar kúdikti zań boıynsha eń aýyr jazany arqalaıtynyn jetkizdi.
«Jarkent óńirindegi jaǵdaı boıynsha kóbi surap jatyr. Birden aıtaıyn, qylmysker bir adam. Ol buryn zorlaý baby boıynsha sottalǵan. Qazir qandyqol qamaýda. Ári qaraıǵy jazasyn quzyrly organdar sońyna deıin ár detalin zerttep, jetkizetin bolady. Ol jaqtan shyǵýy endi neǵaıbyl. Keshe qyz jer qoınyna tapsyryldy. Qyzdyń otbasyna jan-jaqty kómek kórsetilýde. Aýdanda jaǵdaı turaqty. Saqtyq sharalary jasalǵan. Tek chattar men áleýmettik jelilerde ártúrli jalǵan aqparatqa dúrligip jatqan azamattar barshylyq. Olardy túsinýge bolady. Alaıda aınalyp kelgende zardap shegetin ózimiz», deıdi Panfılov aýdany ákiminiń baspasóz hatshysy Nurbol Qanaǵat.
Kez kelgen qylmys bolsyn, qylmysker bolsyn, ultqa bólinbeıdi. Aıyptalýshy ádil jazasyn tartady degen úmittemiz. Oqıǵa barysy ultaralyq sıpat alyp ketpes úshin, qazir Sholaqaı aýylynda qaýipsizdik sharasy kúsheıtilgen.
Aıta keteıik, áleýmettik jelilerde osy derekke qatysty jalǵan aqparat toqtaýsyz taratylýda. Bul úrdis qoǵamdyq kóńil kúıdi buzyp, quqyq qorǵaý organdaryna senimsizdik týdyrýda. Osyǵan oraı qoldanystaǵy zańnamaǵa sáıkes kórineý jalǵan aqparat taratqany úshin jaýapkershilik qaralatynyn eskertemiz jáne azamattardan tek resmı derekkózderge senim bildirýin suraımyz. Sondaı-aq týystarynyń kámeletke tolmaǵan qyzdy óz betinshe izdeý jumystarynyń nátıjesi bolmaǵannan keıin polısııanyń kómegine júgingeni jáne tártip saqshylary jasóspirim qyzdyń iz-túzsiz joǵalǵany týraly derekti dereý tirkep, izdeý amaldaryna kiriskenin atap ótemiz.
Jetisý oblysy
