Qazaqstannyń shahmatshy qyzdar quramasy olımpıadanyń alǵashqy aınalymynda Gvatemala sportshylarymen oınap, 4-0 esebimen jeńiske jetti. Ekinshi raýndta jerlesterimiz Belgııa quramasymen sheberlik baıqasyp, bul joly da qarsylastaryn tize búktirdi – 3-1. Bul kezdesýde Bıbisara Asaýbaeva men Nazerke Nurǵalı óz oıyndarynda jeńiske jetse, Jansaıa Ábdimálik pen Ksenııa Balabaeva teń tústi.
Al alǵashqy aınalymda qytaılyq Taıpeıden 3:1 esebimen basym túsken Qazaqstan erler quramasy ekinshi matchta Tájikstan shahmatshylarynan jeńilip qaldy – 1,5-2,5. Bul matchta Qazybek Nógerbek qarsylasynan basym tússe, Arystanbek Orazaev teń oınady. О́kinishke qaraı, Álisher Súleımenov pen Murtas Qajyǵalıev qarsylastaryna jol berdi.
