30 shilde kúni erekshe qorǵalatyn tabıǵı aımaqqa Toyota Land Cruiser markaly avtokólik kirgeni anyqtaldy.
«Inspektorlyq top avtokóliktiń izi arqyly Buǵyty taýlary Almasaı aımaǵynda memlekettik nómiri joq avtokólikti toqtatty. Kólikti tekserý barysynda myltyqqapqa salynbaǵan úsh dana oıyq uńǵyly myltyq (TIKKA T3 N-308, TIKKA T3x LITE, VEPR-308 ), eki dana pyshaq, bir dana rasııa, jáne arnaıy konteınerge salynǵan et anyqtaldy. Sonymen qatar avtokólik janynan Sibir taý tekesine uqsas ańnyń terisi tabyldy», dep habarlady orman sharýashylyǵy jáne janýarlar dúnıesi komıtetinen.
Vedomstvo ókilderiniń habarlaýynsha, kólikte bolǵan úsh azamat ustaldy. Olar Almaty oblysy Eńbekshiqazaq aýdanynyń jáne Almaty qalasynyń týmalary bolyp shyqty.
Aıǵaq zattarǵa ýaqytsha alyp qoıý qaýlysy toltyrylyp, Uıǵyr aýdany polısııa bólimine tapsyryldy.
