Free fitness, ıaǵnı aǵylshyn tilinen sózbe-sóz aýdarǵanda tegin fıtnes degen maǵynany bildiretin sport nysanynyń bir ereksheligi, mundaǵy ár trenajerge arnaıy QR kod japsyrylǵan. Munda kelgender osy QR kod arqyly aldyn ala Iýtýbke júktelgen erejemen tanysyp, ondaǵy nusqaýlyqtyń kómegimen óz betinshe jattyǵý jasaı beredi. Máselen, bilek bulshyq etterin damytatyn trenajerge otyrsańyz, Iýtýbtegi nusqaýshy tek qana bilekke arnalǵan jattyǵý túrlerin kórsetip, ony qalaı jáne qansha ret jasaý kerektigin túsindiredi. Sport qurylǵysynyń múmkindigi shekteýli adamdarǵa yńǵaıly jeke oryndyǵy bar.
– Qazir qaladaǵy kommersııalyq fıtnes ortalyqtarynyń baǵasy ýdaı qymbat. Men bul jerge ulym úshin kelip júrmin. Biraq bir aıdyń ishinde 2-3 kılo salmaq tastadym. Ádet qyp alǵanymyz sonshalyq, munda bir kún kele almaı qalsaq, birdeme jetispeı turǵan sııaqty sezimde bolamyz. Balam 14 jasta, buryn gir kóterýmen aınalysqan. Jańa shaǵyn aýdanǵa qonys aýdarǵaly, sport mektebi alystap ketip, amalsyz tastaýǵa týra keldi. Qazir birtindep qaıta jattyǵyp júr. Eń bastysy, qandaı snarıad kerek, sonyń bári bar. Iýtýbtegi pleıparaqshada bári túsinikti jazylǵan, tipti jattyqtyrýshy kómeginiń de qajeti joq, – deıdi «Iýbıleınyı» shaǵyn aýdanynyń turǵyny Janar Jaqypova.
Qalanyń ákimdigi qazir ashyq fıtnes alańynyń aýmaǵyn jaryqtandyryp, oryndyqtar men qoqys jáshikterin qoıyp jatyr. Odan keıin beınebaqylaý qoıylady. Turǵyndarǵa qolaıly bolý úshin jaýyn-shashyn men kún kózinen qorǵaıtyn shatyr ornatý da josparda bar.
Turǵyndardyń salamatty ómir saltyn ustanýyna jaǵdaı týǵyzatyn dál osyndaı tegin fıtnes alańy Jitiqara qalasynda da bar.
Qostanaı oblysy
