Kollajdy jasaǵan Záýresh SMAǴUL, «EQ»
«QazTransGaz» AQ Qostanaı fılıalynyń málimetinshe, uzyndyǵy 170 shaqyrymǵa jýyq gaz qubyry 60 jylǵa jaqyn jóndeýden ótpegen. Kompanııa mamandary bıyl defektoskopııalyq taldaý jumystaryn júrgizý barysynda tot basyp juqara bastaǵan qubyrda qaýipti aqaýlardyń shamadan tys kóbeıip ketkenin anyqtap, kún sýytpaı turyp tozǵan qubyrdy aýystyryp tastaý týraly sheshimge kelip otyr. Olaı bolmaǵan jaǵdaıda, jylý maýsymy bastalǵan soń tótenshe apat oryn alyp, eldi mekender men óndiris oryndary, balabaqsha, mektep, aýrýhana sııaqty áleýmettik nysandar qystyń qaqaǵan aıazynda jylýsyz qalýy yqtımal deıdi mamandar.
Qubyr jóndeýge baılanysty gazdyń toqtatylýy óńir turǵyndary men óndiris barysynda kógildir otyn paıdalanatyn kásiporyndarǵa qıyndyq týǵyzaıyn dep tur. Bul týraly taıaýda qalalyq ákimdikte ótken jıynda da sóz boldy. Kásipkerlik jáne aýyl sharýashylyǵy bóliminiń jetekshisi Ilona Tımoshenkonyń aıtýynsha, tamyz aıynda Qostanaıdyń ózinde óndirisi kógildir otynǵa táýeldi segiz kásiporyn jumysyn toqtatady. Olardyń ishinde qurylys materıaldaryn óndiretin zaýyttar bar.
– Qostanaıda qurylys salasyna jyl saıyn 95 mıllıon kirpish paıdalanylady. Gazdyń bolmaýyna baılanysty, «Qostanaı-MBI», «Romana» jáne «BK-beton» seriktestikteri sııaqty temir betondy ónimder shyǵaratyn zaýyttardyń ónim kólemi úsh esege deıin qysqarýy múmkin. Sondyqtan memleketten tapsyrys alǵan merdigerlerdiń ózderine qajet kirpish jáne temir-beton ónimderin Reseı men irgeles oblystardaǵy zaýyttardan ákelip alǵany jón. Qaladaǵy óndiris oshaqtarynyń kógildir otynsyz qalýy óńirdiń áleýmettik-ekonomıkalyq damý kórsetkishterine de keri áserin tıgizgeli otyr. Máselen, «SaryarqaAvtoProm» JShS, «Bolshevıchka» tigin fabrıkasy, «Dormash» JShS sııaqty kásiporyndar óndiriste tabıǵı gaz paıdalanbaıdy. Al «Agromash Holdıng KZ» AQ, «Qostanaı traktor zaýyty» jáne birqatar un tartatyn kásiporyn qyzmetin ishinara toqtatady. «EvrazKaspıanStal» JShS, «Qostanaı un kombınaty» AQ jáne Iýrchenko JK nan zaýyty óz qyzmetin tolyǵymen toqtatady. «Baıan Sulý» kondıterlik fabrıkasynyń dızel otynyna kóshetin múmkindigi bar. Alaıda munyń shyǵyny kóp bolǵandyqtan, kásiporyn tamyz aıynda jóndeý jumystaryn júrgizedi. Kirpish zaýyttarynyń qyzmeti tolyǵymen toqtatyldy, – deıdi I.Tımoshenko.
Oblys turǵyndary tamyzdyń ortasyna deıin elektr qýatymen amaldap as-sýyn qamdaı turar. Gazdyń joqtyǵy, ásirese, naýbaıhanalarǵa aýyr tıgen sııaqty. Qalalyq ákimdiktiń málimetinshe, 1 tamyzdan bastap oblys ortalyǵyn ystyq nanmen qamtyp otyrǵan «Sýhın», «Iýrchenko S.V.» jeke kásipkerlik nysandary men «Sýzan A», «Altyn-Nan» jaýapkershiligi shekteýli seriktestikteri jumysyn toqtatty. Olardyń mindettemelerin táýligine 4 jarym myń bólke nan pisiretin «Bagdasarıan» jáne kúnine 2 jarym myń áleýmettik nan shyǵaratyn «Astyqjan Qostanaı» jeke kásipkerlik nysandary atqaratyn bolady. Áıteýir, qalalyq ákimdik tamyzda nan tapshylyǵy týyndamaıdy degendi aıtyp otyr.
Qalalyq turǵyn úı sharýashylyǵy bóliminiń basshysy Asylhan Hákimovtyń sózinshe, oblys ortalyǵynda uzyn sany 1 myń 332 óndiristik kásiporyn jáne jol jóndeýmen aınalysatyn merdiger uıymdarǵa tıesili asfalt zaýyttary, sondaı-aq 1 myń 15 kommýnaldyq-turmystyq tutynýshy kógildir otynnan ýaqytsha ajyratylady.
Buǵan deıin gaz jaǵyp kelgen «Arvıs» asfalt-beton zaýyty dızeldi otynǵa kóshti. «Arasan», «Mılh», «DEP» tárizdi iri seriktestikter de elektr pesh jaǵatyn bolady.
Kógildir otynsyz kezeńde kópqabatty turǵyn úılerde gaz ballondaryn paıdalanýǵa tyıym salyndy. Qalalyq turmystyq qatynastar bóliminiń mamandary turǵyndarǵa boıler men elektr peshin paıdalanýdy keńes etip otyr.
Gaz qubyryn jóndeý jumystary áýelde tamyzdyń 1-inen 25-ine deıin sozylady dep josparlanǵan. Shildeniń 31-inde «QazTransGaz» Reseı aýmaǵynda «Buqara – Oral» gaz magıstralynyń 1 832,5 shaqyrymyndaǵy qubyrdyń tesilýine baılanysty Qostanaı oblysyndaǵy qubyr jóndeý jumystary 3 tamyzǵa shegeriletinin habarlady.
Al budan burynyraq óńir basshysy Arhımed Muhambetovtyń oblys ákimdigi men «QazTransGaz» AQ arasynda jóndeý merzimin qysqartý týraly ýaǵdalastyqqa qol jetkenin málimdegen. Oblys ákimi «Kelisim boıynsha gaz qubyryn jóndeý jumystaryn 12-14 kúnniń ishinde aıaqtaý josparlandy. Jumysty tezirek bitirý úshin ózge oblystardan mobıldi toptar kómekke keledi», dep edi, endi jóndeý jumystary keıinge shegerilgendikten, tutynýshylar tamyzdyń jıyrmasyna deıin gazsyz amaldaı turady.
О́ńirde tabıǵı gazdy 90 myń 613 turǵyn tutynyp otyr. Olardyń 72 129-y kópqabatty turǵyn úılerde, al 17 152-si jeke úılerde turady.
Qostanaı elektr ortalyǵynyń mamandary gazsyz kúnderi toq kózin tutynýshylar kóbeıetindikten, elektr jelilerine artyq kúsh túsetinin, sondyqtan úıdegi elektr qurylǵylaryn bir mezgilde birdeı paıdalanýǵa bolmaıtynyn eskertip otyr.
Kógildir otynsyz kezeńde oryn alýy múmkin tosyn oqıǵalardyń aldyn alý maqsatynda «EPK-forfait» seriktestiginiń apatty joıý brıgadalary kezekshilik atqaratyn bolady.
«QazTransGaz» AQ gaz qubyryn jóndeý jumystaryn 15 tamyzǵa deıin aıaqtaýǵa ýáde berip otyr. Odan keıin tutynýshylar birte-birte gazǵa qosyla bastaıdy.
Qostanaı oblysy
