«2022 jyldyń 30 shildesi kúni oblys aýmaǵynda jalpy COVID-19 dertiniń 28 215 jaǵdaıy tirkeldi. 100 myń turǵynǵa shaqqanda aýrýshańdylyq kórsetkishi 2 451-di qurady. Pnevmonııanyń 8 661 jaǵdaıy tirkelgen (100 myń turǵynǵa shaqqandaǵy kórsetkish – 752,4). Al ótken táýlikte koronavırýs dertine shaldyqqandardyń 101 jaǵdaıy anyqtaldy, pnevmonııa aýrýyn juqtyrǵan azamat tirkelgen joq. Jalpy, búginge deıin 26 738 azamat dertinen saýyǵyp shyqty», deıdi oblys ákimdigi densaýlyq saqtaý basqarmasynyń basshysy Áset Qalıev.
Basqarma basshysynyń aıtýynsha, qazirgi kezde syrqatqa shaldyqqandardy ınfeksııalyq stasıonarǵa ornalastyrý boıynsha eshqandaı másele joq. Búgingi tańda óńirde 261 tósektik orny bar bolsa, onyń 29 paıyzy ǵana dert juqtyrǵan azamattarmen tolǵan. Onyń ishinde 8 azamat jansaqtaý bóliminde em qabyldap jatyr. Bul qarastyrylǵan tósektik orynnyń 28 paıyzyn qurap otyr.
Jalpy, oblys boıynsha 23 BMSK uıymdarynda 45 egý pýnkti bar, olardyń 16-sy qalada ornalasqan bolsa, 29-y – aýdandarda.
2021 jyldyń 1 aqpanynan bastap oblysqa 380 440 doza QazCovid-in – otandyq vaksınasy (190 220 adamǵa), 843 590 doza Spýtnık V (421 795 adamǵa), 60 myń doza (30 myń adamǵa) Haıat Vaks, 34 myń doza (17 myń adamǵa) KoronaVak, 303 myń (151 500 tulǵaǵa) arnalǵan VeroSell Sınofarm, 10 myń doza Spýtnık Laıt, 333 450 doza Pfizer (SShA) vaksınasy jetkizilgen bolatyn.
«О́ńirde 638 897 azamat vaksınany (101,2%) birinshi komponentimen, 633 121 adam ekinshi komponentin (100,3%) saldyrdy. Vaksına qabyldaǵannan keıin derttiń asqyný jaǵdaıy tirkelgen joq. Búgingi tańda 18 jastan asqan azamattardy vaksınalaý úshin ekinshi komponent boıynsha 2 313 doza vaksına qaldy. Revaksınalaýdan ótken azamattardyń sany 408 984 adamdy qurap otyr. Faızer vaksınasynyń birinshi komponentimen 133 531 adam (bul 139 230 adamnyń 95,9%-y), ekinshi komponentimen 129 233 adam (92,6%) qamtylǵan. Onyń ishinde 113 936 (103.4%) jasóspirim, 4 441 (57,4%) júkti áıel jáne 15 154 (71,2%) bala emizetin áıel qamtyldy», deıdi Á.Qalıev jaǵdaıdy túsindirip.
Onyń sózine súıensek, óńirde koronavırýs ınfeksııasymen kúres qalypty deńgeıde júrgizilip jatyr. Mamandar qaýipti derttiń aldyn alýda aıanbaı eńbek etýde. Áıtkenmen, turǵyndar saqtyq sharasyn saqtaǵany lázim. Atalǵan dertke shaldyqqandardyń qarasy artqan jaǵdaıda, olardy qabyldaý úshin rezervte turǵan qosymsha tósektik oryndar jetkilikti.
«Jalpy, óńirdegi jaǵdaı baqylaýda. Degenmen turǵyndar saqtyq sharasyn saqtaǵannan utylmaıdy. Azamattar osyny qaperden shyǵarmasa eken», deıdi óńirdiń bas dárigeri.
Jambyl oblysy
