Bıyl jergilikti joldardyń sapasyna baqylaý júrgizý barysynda 9 myńǵa jýyq synama alyndy, olardyń 2,5 myń synamasy nemese 28%-y talaptarǵa sáıkes kelmedi.
Mınıstrdiń aıtýynsha, sáıkessizdik Shymkent, Almaty, Túrkistan jáne Shyǵys Qazaqstan, Batys Qazaqstan, Mańǵystaý oblystarynda tabyldy.
«Eskertýlerge qaramastan, tapsyrys berýshiler obektilerdi paıdalanýǵa qabyldaýdy jalǵastyrýda. Mundaı faktiler boıynsha jekelegen óńirlerde qylmystyq ister qozǵaldy», dep atap ótti Qaıyrbek О́skenbaev Úkimet otyrysynda.
Aqtóbe oblysynda sapa ortalyǵynyń eskertýlerinen keıin joldy sapasyz oryndaý jáne qabyldaý faktisi boıynsha qylmystyq is qozǵaldy.
О́skenbaev bul rette qarjylandyrýdy tepe-teń bólý máselesi ótkir turǵanyn atap ótti. Jekelegen salalar bul talaptardy saqtamaıdy.
«Mysaly, Memleket basshysynyń jergilikti joldardy damytý týraly tapsyrmasyna qaramastan, Batys Qazaqstan oblysynda avtojoldardyń jaǵdaıyn jaqsartýdyń tómen qarqyny baıqalady. О́tken jyldyń qorytyndysy boıynsha óńir joldarynyń normatıvtik jaǵdaıy 39%-dy qurady, ortasha respýblıkalyq máni 80%. Sonymen qatar Batys Qazaqstan oblysynyń ákimdigine osy jyly joldarǵa 2,6 mlrd teńge bólindi, bul barlyq bıýdjettiń 10%-yn quraıdy», dedi Qaıyrbek О́skenbaev.
Indýstrııa mınıstrliginiń basshysy Premer-Mınıstrge osy aıdyń sońyna deıin avtojol jobalarynda sapa men baqylaýdy kúsheıtý jónindegi usynystardy jeke tanystyrýǵa ýáde berdi.
