Joint Commission International (JCI) akkredıtteýi – medısınalyq qyzmet sapasynyń, pasıent qaýipsizdiginiń, emdeýdiń durys jáne zamanaýı ádisterin qoldanýdyń eń joǵarǵy kórsetkishi. Osylaısha, MOA medısınalyq mekemeler arasynda sapa men qaýipsizdik salasyndaǵy joǵary standarttarǵa saı ekenin rastady.
Medısınalyq ortalyq aýrýhanasynyń dırektory Valerıı Benberın mekemeniń akkredıtteý sertıfıkatynyń bolýy kórsetiletin qyzmet deńgeıiniń tikeleı kórsetkishi ekenin atap ótti.
«Biz úshin álemde medısınalyq qyzmet kórsetý sapasyn jaqsartý jónindegi jahandyq úderistiń bir bóligi bolý – úlken mártebe. JCI aýdıtorlaryna nátıjeli jumysy men qajyrly eńbegi úshin alǵysymyzdy bildiremiz. Aýrýhananyń halyqaralyq standartty rastaýy – biz úshin pasıentterdiń qaýipsizdigi men qyzmet sapasynyń joǵary bolýy birinshi orynda ekendiginiń taǵy bir dáleli», dedi Valerıı Benberın
Aıta ketý kerek, Medısınalyq ortalyq aýrýhanasy JCI sertıfıkatyn alǵash ret 2016 jyly alǵan bolatyn. Sertıfıkat alǵan medısınalyq uıymdar ony ár úsh jyl saıyn rastap otyrady.
Jyl saıyn QR PIB Medısınalyq ortalyǵynyń aýrýhanasy klınıkalyq kórsetkishter boıynsha da, menedjment kórsetkishteri boıynsha da Qazaqstan Respýblıkasy stasıonarlaryq qyzmetiniń reıtıngtik baǵalaý tiziminde jetekshi oryn alady. Aýrýhananyń emdik-dıagnostıkalyq bólimsheleri zamanaýı medısınalyq jabdyqtarmen qamtamasyz etilgen. Aýrýhanada qoldanylatyn tehnologııalardyń Qazaqstanda, keıbireýiniń TMD elderinde de balamasy joq. Jyl saıyn QR PIB MOA-da 8000-nan astam pasıent emdeledi.
