Toptyq kezeńniń úshinshi týrynda jolyqqan komandalar tórtinshi týrda da bir-birimen kezdesip, mańyzdy upaılardy sarapqa saldy. Aldymen, «A» tobyndaǵy oıyndarǵa toqtalar bolsaq, Almatynyń «Qaıraty» ótken týrda óz alańynda Pavlodardyń «Aqsýyn» qabyldap, 3:2 esebimen jeńiske jetken. Bir aptadan keıingi qarymta kezdesýde 1:1 esebi tirkeldi. Toptaǵy ekinshi oıynda da osyǵan uqsas jaǵdaı tirkeldi. Úshinshi týrda «Atyraýdy» qonaqta 4:1 esebimen oısyrata jeńgen Shymkenttiń «Ordabasy» klýby óz alańyndaǵy tórtinshi týrdyń matchynda «Atyraýdan» 1:2 esebimen jeńilip, bir apta burynǵy basymdyǵyn saqtaı almady.
Tórt týrdan keıin týrnır kestesinde «Qaırat» 10 upaımen kósh bastap keledi. Ekinshi jáne úshinshi oryndaǵy «Ordabasy» men «Atyraý» enshisinde 6 upaı bar. Al «Aqsý» bir upaımen kósh sońynda qalyp qoıdy.
«V» tobynda alǵashqy úsh týrdan keıin 100 paıyzdyq nátıjemen birinshi orynda kele jatqan Qyzylordanyń «Qaısary» tórtinshi týrda bilgeninen jańylyp, «Kaspııden» jeńilip qaldy. Qyzylordadaǵy Ǵanı Muratbaev atyndaǵy stadıonda ótken tórtinshi týrdyń matchynda aqtaýlyqtar 2:1 esebimen basym tústi. Osydan bir apta buryn Aqtaýda ótken matchta qyzylordalyqtar dál osyndaı eseppen jeńiske jetken bolatyn.
Al jýyrda ǵana Konferensııa lıgasynyń ekinshi irikteý kezeńinde Horvatııanyń «Osıek» klýbyn jarys jolynan shyǵaryp jibergen «Qyzyljar» kýbok oıynynda Oraldyń «Aqjaıyǵynan» jeńilip qaldy. «Astana Arena» stadıonynda ótken kezdesýde petropavldyqtar qaqpasyna jaýapsyz eki gol ótkizip aldy. Apta burynǵy Oraldaǵy matchta alań ıeleriniń jeńisimen aıaqtalǵan edi – 1:0. Tórt týrda bir-aq upaı jınaǵan «Qyzyljardyń» endi Qazaqstan kýbogynyń pleı-off kezeńine shyǵý múmkindigi asa tómen deýimiz kerek. «V» tobynyń týrnır kestesinde 9 upaıy bar «Qaısar» men «Aqjaıyq» alǵashqy eki oryndy ózara bólisip tur. Al «Kaspııdiń» enshisinde ázirge 4 upaı bar.
Kýbok jolyndaǵy toptyq kezeńge qatysyp jatqan 16 komandanyń ishinde birinshi bolyp Túrkistan oblysynyń «Maqtaaral» ujymy jarystyń pleı-off kezeńine joldama aldy. «S» tobynda baq synap jatqan Premer-lıga debıýtanty keıingi eki týrda da byltyrǵy el chempıondary – «Tobyldan» basym tústi. Eýrokýboktaǵy oıyndaryna baılanysty eki matchqa da jastar quramyn shyǵarǵan «Tobyl» óz alańynda 1:4, syrt alańda 0:1 esebimen qarsylastaryna jol berdi.
Al «Taraz» ben «Aqtóbe» qatarynan eki týrda teń oınap, mańyzdy upaılarynan qaǵyldy. Tarazdaǵy match 0:0 esebimen teń aıaqtalsa, Aqtóbedegi oıynda 1:1 esebi tirkeldi. Týrnır kestesinde «Maqtaaral» 9 upaımen birinshi oryndy ıelenip tur. «Taraz» 8 upaımen ekinshi orynǵa jaıǵasqan. «Tobyldyń» enshisinde – 3, «Aqtóbede» 2 upaı bar.
«D» tobyndaǵy tórttikte ázirshe «Astana» men «Shahterdiń» jaǵdaıy shamalas. Elordalyqtar ótken týrda Túrkistannan astanaǵa bir upaımen (1:1) oralǵan bolatyn. Bir aptadan keıingi qarymta matchta «Astana» «Turandy» 2:1 esebimen tize búktirip, mańyzdy úsh upaıyna qol jetkizdi. Taldyqorǵanda «Jetisýdyń» osal tusyn taba almaǵan «Shahter» (0:0) tórtinshi týrda Birinshi lıganyń klýbyn 4:2 esebimen qapy qaldyrdy.
Týrnır kestesinde «Astana» 8 upaımen birinshi orynǵa jaıǵasqan. Al bir upaı kem jınaǵan «kenshiler» komandasy elordalyqtardy ókshelep keledi. Bir oıynda jeńiske jetip, bireýinde teń túsken «Turan» fýtbolshylary 4 upaımen úshinshi satyǵa, «Jetisý» 2 upaımen tórtinshi orynǵa turaqtaǵan.
Tórtinshi týr oıyndarynyń statıstıkasyna toqtalar bolsaq, elimizdiń jeti qalasynda ótken segiz matchqa («Qyzyljar» óz alańyndaǵy matchtardy elordada ótkizip júr) jalpy sany – 25 761 jankúıer keldi. Eń kóp kórermen (12 861) «Aqtóbe» – «Taraz» matchyn tamashalasa, eń az jankúıer «Qyzyljar» men «Aqjaıyq» oıynyna bardy (500 kórermen).
8 matchty tamashalaýǵa kelgen 25 761 kórermen tórtinshi týrda 22 goldyń kýási bolsa, onyń ekeýi penaltıden soǵyldy. Sonymen qatar bul týrdyń jyldam golyn «Aqsý» oıynshysy Damır Marat pen «Astananyń» jartylaı qorǵaýshysy Pedro Eýjenıo 2-mınýtta saldy. Al eń sońǵy goldy «Maqtaraldyń» fýtbolshysy Jan Alı Paırýz 90+1-mınýtta qaqpa toryna engizdi.
Bul týrda eki fýtbolshy qyzyl qaǵaz alyp, alańnan qýyldy. Biri – «Qaırattyń» qaqpashysy Vadım Ýlıanov (83-mınýtta) bolsa, ekinshisi – «Qaısardyń» qorǵaýshysy Olıveıra Joao Pedro (90+2-mınýtta). 38 fýtbolshy tóreshi tarapynan sary qaǵazben jazalandy. Eń qyzyǵy, «Aqtóbe» – «Taraz» matchynda birde-bir oıynshyǵa sary jáne qyzyl qaǵaz kórsetilgen joq.
5-7 tamyz kúnderi ótetin besinshi týrda «Aqjaıyq» – «Qaısar», «Turan» – «Shahter», «Aqtóbe» – «Maqtaaral», «Atyraý» – «Aqsý», «Tobyl» – «Taraz», «Astana» – «Jetisý», «Qyzyljar» – «Kaspıı» jáne «Ordabasy» – «Qaırat» komandalary kezdesedi. Al sońǵy altynshy týr oıyndary 13-14 tamyzǵa josparlanǵan.
