Shahardaǵy О́skemen kóshesinde kólik keptelisi jıi oryn alady. Atalǵan máseleni birjolata sheship, kólik quraldarynyń ótkizý qabiletin arttyrý úshin osy aýmaqta, aıtalyq, Shaıjúnisov kóshesinen 6-shy lınııa kóshesine deıin joldy keńeıtý jumystary júrgizilip jatyr.
«Bul kóshedegi kólik keptelisi turaqty kóriniske aınalyp ketkendikten joldy keńeıtý kerek. Eger de qandaı da bir kómek qajet bolsa, habarlasyńyzdar, barynsha qoldaý kórsetemiz. Alaıda osy jol qurylysyn aıaqtaýymyz qajet. Sebebi bul jol boıyndaǵy bıznes úshin de mańyzdy. Saıajaı massıvterinde adam kóp turady. Sondyqtan bul óte mańyzdy másele», dedi Nurlan Uranhaev.
Atalǵan kóshedegi kúrdeli jóndeý jumystary bıyl mamyrda bastalǵan edi. Joldyń uzyndyǵy – 1,5 shaqyrym, al jobanyń quny – 1 122,6 mln teńge. Barlyq jumys aldaǵy qarasha aıynda aıaqtalýǵa tıis.
Qazir О́skemen kóshesinde jobaǵa sáıkes jer tósemin ornatýǵa baılanysty jumystar júrgizilip jatyr. Áıtse de, mundaǵy qurylysqa barlyǵy birdeı dán rıza dep aıtý qıyn. Máselen, jekelegen kásipkerler joldyń jóndelýi olardyń bıznesti júrgizýine kedergi keltirip otyrǵandaryn aıtyp shaǵymdandy.
«Osy qurylystyń saldarynan qorshaýda qalyp qoıdyq. Endi qalaı jumys isteımiz? Bul áli birneshe aıǵa sozylady. Eki aıǵa jýyq jumys istemeı qalaı júremiz?», dep renishterin jetkizdi jergilikti kásipkerler.
N.Uranhaev óz kezeginde jańǵyrtý jumystaryn jyldamdatyp aıaqtaý qajet ekenin aıtyp, merdiger uıymǵa jumys ýaqytyn arttyrýdy tapsyrdy. Atap aıtqanda, kúndizgi ýaqytty barynsha tıimdi paıdalaný kerek ekenin jetkizdi. Sonymen qatar óńir basshysy oblystyq avtomobıl joldary jáne jolaýshylar kóligi basqarmasynyń basshysyna merdiger uıym ókilderi jáne kásipkerlermen kezdesip, joldy kezeń-kezeńimen ashý múmkindigin talqylaýdy tapsyrdy.
Atalǵan jóndeý jumystary barysynda О́skemen kóshesindegi elektr energııasymen qamtıtyn tirekter aýystyrylyp, Shyǵys kentiniń batpaqty aýmaǵy arqyly Kóshkinbaev kóshesinen Aıýchenko kóshesine deıin shyǵatyn aınalma jol salynǵanyn aıta ketken oryndy.
SEMEI
