Bıyl 26 shildede Ulttyq bank bazalyq mólsherlemeni 0,5 bazalyq tarmaqqa (14-ten 14,5 paıyzǵa) kótergennen keıin QDKBQ ekinshi deńgeıli bankterge salymdar boıynsha mólsherlemelerdi kóterýge usynys bildirgen edi.
Aıta keteıik, elimizde 20 bank – kepildendirilgen depozıt júıesiniń qatysýshysy. QDKBQ jınaqtaýshy salymdar boıynsha – 20 mln teńgege deıin, jınaqtaýshydan ózge teńgemen saqtalǵan barlyq depozıtter boıynsha – 10 mln teńgege deıin, shetel valıýtasyndaǵy depozıtter boıynsha 5 mln teńgege deıin kepildik beredi.
Turǵyndardyń barlyq salymdary zańmen belgilengen óteýdiń eń joǵary somasyna deıin kepildikpen jabylady. Bul rette qordyń kepildik ótemaqy tóleýge arnalǵan rezervi qordyń jarǵylyq kapıtalynyń 70 paıyzyn esepke alǵanda 944,3 mlrd teńgege jetti. Ony ótemaqy tóleýge de paıdalanýǵa bolady.
«Jınaqtalǵan rezerv jeke tulǵalardyń depozıttik bazasynyń 7 paıyzdan astamyn quraıdy, bul zańda kózdelgen 5 paıyzdyq deńgeıden joǵary. Bul kórsetkish úzdik álemdik tájirıbege sáıkes keledi jáne damyǵan elder deńgeıinde. Osylaısha, qazaqstandyqtardyń jınaqtary kepildik ótemaqynyń eń joǵary mólsheri sheginde tolyqtaı qorǵalady. Sheteldik bankterdiń enshiles uıymdaryn qosa alǵanda, qazaqstandyq bankterdegi depozıttik shottardyń 99,8 paıyzy tolyq kepildikpen qorǵalǵan», dep túsindirdi bul jaǵdaıdy qor basshysy Ádil О́tembaev.
Ázirge bankter arasynan tek Home Credit Bank qana mólsherlemelerdi joǵarylatty. Qarjy ınstıtýty «Prostoı» jáne «Pochtovyı Hoým» shuǵyl depozıtteri boıynsha jyldyq tıimdi mólsherlemeni 14 paıyz, al jınaqtaýshy depozıt boıynsha maksımaldy jyldyq tıimdi mólsherlemeni 16 paıyzǵa deıin kóterdi. Bul banktegi salymnyń mınımaldy somasy 1000 teńgeden bastalady. Odan ári qansha somaǵa deıin salam dese de shektelmeıdi.
Depozıtterge kepildik berý qorynyń habarlaýynsha, bolyp jatqan geosaıası táýekelder, ınflıasııalyq úderisterdiń kúsheıýi, qańtar oqıǵasy jáne odan keıin reseılik enshiles bankterge áser etken yqpalsharalyq shekteýler bankterdiń jıyntyq bólshek depozıttik bazasynyń parametrlerine áser etpeı qoımady.
«Osyǵan qaramastan, QDKBQ halyqtyń bank depozıtterine turaqty senimi saqtalǵandyǵyn atap ótedi. 2022 jyldyń aqpan-naýryz aılaryndaǵy valıýta baǵamdarynyń joǵary qubylmalylyǵy jaǵdaıynda aıyrbas baǵamyn qaıta baǵalaý depozıtterdiń aılyq serpinine aıtarlyqtaı áser etti. Teńgedegi depozıtter boıynsha jalpy qaldyq mamyrda 0,7 paıyzǵa ósse, naqty valıýtalyq qaldyqtar 0,8 paıyzǵa ósti. Bul 2022 jyldyń mamyr aıynyń sońyna qaraı jeke tulǵalardyń depozıtteriniń jalpy kóleminiń 0,9 paıyzǵa (12,8-den 12,7 trln teńgege deıin) azdap tómendeýi ulttyq valıýtanyń 4,7 paıyzǵa nyǵaıýy áserinen valıýtanyń qaıta baǵalanýymen baılanysty boldy (bir dollar mamyrdyń basynda 448,49 teńgeden mamyrdyń aıaǵynda 427,39 teńgege deıin)», delingen qor habarlamasynda.
Qor tóraǵasy Ádil О́tembaevtyń aıtýynsha, azamattardyń teńgemen ashqan depozıtteriniń aıtarlyqtaı ósimi baıqalady. Bul naryqtaǵy jaǵdaıdyń turaqtanǵanyn, sondaı-aq halyqtyń ulttyq valıýtaǵa degen seniminiń saqtalǵanyn kórsetedi deıdi ol.
