Eń alǵash 1927 jyly «Ulttar týrnıri» retinde uıymdastyryla bastaǵan shahmatshylar básekesi 1940 jyldan bastap shahmat olımpıadasy degen ataýmen eki jylda bir ret ótkizilip keledi. Ulybrıtanııa astanasy – Londonda bastaý alǵan jarys 1931 jylǵa deıin jylyna bir márte uıymdastyrylsa, 1933 jyldan keıin jıiligin eki jylǵa uzartty.
Bıyl 44-shi ret ótkizilip jatqan olımpıadaǵa 186 memlekettiń sportshylary qatysýda. Jarystyń alǵashqy tórt týrynyń qorytyndysy boıynsha Qazaqstannyń qyzdar quramasy úsh matchta jeńiske jetip, sońǵy oıynynda qarsylastarymen teń tústi. Al erler arasyndaǵy saıysta jerlesterimiz olımpıadany sátti bastaǵanymen, ekinshi týrda Tájikstanǵa ese jiberdi. Biraq keıingi eki kezdesýde jeńis týyn jelbiretti.
Bıbisara Asaýbaeva bastaǵan qyzdar quramasy alǵashqy aınalymda Gvatemala shahmatshylarymen sheberlik baıqasyp, 4:0 esebimen basym tústi. Ekinshi raýndta Belgııa quramasyn tize búktirdi – 3-1. Bıbisara Asaýbaeva men Nazerke Nurǵalı óz oıyndarynda jeńiske jetse, Jansaıa Ábdimálik pen Ksenııa Balabaeva teń oınady. Perý quramasymen bolǵan úshinshi týrda da 3:1 esebi tirkeldi. B.Asaýbaeva, K.Balabaeva jáne G.Naqbaeva qarsylastarynan basym tússe, N.Nurǵalı jeńilip qaldy. Al ázirge sońǵy, tórtinshi týrda Mońǵolııa shahmatshylarymen teń oınady – 2:2. Qazaqstan quramasyna jalǵyz jeńisti Ksenııa Balabaeva syılady. Bıbisara men Gúlishan teń nátıje kórsetse, Nazerke qarsylasyna jol berdi.
Qazaqstan erler quramasy alǵashqy aınalymda qytaılyq Taıpeımen kezdesip, 3:1 esebimen ústemdik tanytty. Bul kezdesýde Qazybek Nógerbek pen Álisher Súleımen jeńis toıyn toılasa, Arystan Orazaev pen Murtas Qajyǵalıev teń nátıjege qol jetkizdi. О́kinishke qaraı, jerlesterimiz ekinshi matchta Tájikstan shahmatshylaryna jol berdi – 1,5-2,5. Alaıda keıingi eki týrda Lıvandy – 4:0, Marokkony 2,5:1,5 esebimen jeńdi.
Keshe Qazaqstan erler quramasy Latvııa quramasymen, qyzdarymyz Kýba shahmatshylarymen sheberlik baıqasty. Shahmat olımpıadasynda sportshylar shveısarııalyq júıe boıynsha 11 týr oınaıdy.
