Aksııa 2022 jylǵy 31 tamyzǵa deıin, ıaǵnı jańa oqý jyly bastalǵanǵa deıin jalǵasady.
Naýqanǵa kez kelgen adam qatysa alady: eriktiler, bıznesmender, mesenattar, úkimettik emes uıymdar jáne t.b. Qatysýshylar muqtaj otbasylar men balalarǵa qoldaý kórsete alady nemese kerisinshe kómek suraı alady.
«Aksııa az qamtylǵan, kóp balaly otbasylardan shyqqan mektep oqýshylaryna, jetim jáne ata-anasynyń qamqorlyǵynsyz qalǵan balalarǵa qajetti kómek kórsetý maqsatynda ótkizilip otyr. Balalardy jańa oqý jylyna daıyndaýǵa kez kelgen adam kómektese alady. Osylaısha áleýmettik sebeptermen balalardyń mektepke barmaýynyń aldyn alamyz. Árbir mektepte áleýmettik kómekke muqtaj balalardyń ataýly, jeke tizimderi jasalǵan. Bilim berý uıymdarynda «jedel jeli» úzdiksiz jumysy uıymdastyrylǵan. Qıyn ómirlik jaǵdaıǵa tap bolǵan barlyq bala men ata-ana kómek suraı alady. О́z kezeginde beı-jaı qaramaıtyn azamattar, kásipkerler, mesenattar aksııaǵa qosylyp, muqtaj jandarǵa qol ushyn soza alady», dedi QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Esenǵazy Imanǵalıev.
«Mektepke jol» aksııasy jyl saıyn jańa oqý jyly qarsańynda ótkiziledi. Búginge deıin aksııa sheńberinde 2 mln-nan astam balaǵa materıaldyq kómek kórsetildi.
