Densaýlyq saqtaý mınıstri Ajar Ǵınııat 20 maýsymnan bastap respýblıkada KVI aýrýynyń ósýi baıqalǵanyn, sońǵy eki aptada syrqattanǵandardyń sany 3,2 ese, ıaǵnı 10 714-ten 34 550 jaǵdaıǵa deıin óskenin aıtqan bolatyn.
«Búgingi tańda ınfeksııalyq tósekterdiń qamtylýy 30%-dy, bul shamamen 1 500 pasıentti quraıdy, reanımasııalyq tósekterdiń 7%-y 45 pasıentti quraıdy. Mınıstrlik koronavırýs ınfeksııasynyń taralýyna jol bermeý jáne epıdemııaǵa qarsy ýaqtyly aldyn alý sharalaryn qabyldaý maqsatynda turaqty negizde óńirlerdegi ahýaldy baǵalaý júrgiziledi jáne jaǵdaıdy turaqtandyrýǵa baǵyttalǵan jedel sharalar qabyldaıdy. Medısınalyq uıymdardyń KVI-ge daıyndyǵy turaqty negizde qamtamasyz etiledi. Búgingi tańda 189 medısınalyq uıymda 4 900-den asa kovıdtik tósek, 620 reanımasııalyq oryn, rezervte 20 myńnan asa oryn bar», dedi A.Ǵınııat.
Bas shahardaǵy jaǵdaı da máz emes. Qoǵamdyq densaýlyq saqtaý basqarmasynyń málimetine súıensek, keshe qalada 949 indet juqtyrý jaǵdaıy tirkelgen.
Búgingi tańda 7 ınfeksııalyq stasıonar jumys isteıdi, ınfeksııalyq stasıonarlardyń tósektik oryn syıymdylyǵy 694 tósekti quraıdy. 361 adam ınfeksııalyq stasıonarlarda jatyr, tósektik oryn júktemesi 52%-dy quraıdy. Onyń ishinde KVI rastalǵan stasıonarlardaǵy pasıentter sany – 347 adam, pnevmonııamen 14 adam emdelýde. Jansaqtaý bólimshesinde 23 pasıent em alýda, onyń ishinde bireýi О́JJ-ge qosylǵan. Bul bólimshedegi júktemesi 28%-dy quraıdy. Búginde jedel medısınalyq járdem stansasyna KVI boıynsha táýligine 43 shaqyrtý túsedi. Nur-Sultan qalasy boıynsha ótken táýlikte 4 714 zerthanalyq zertteý júrgizilip, 949 jańa jaǵdaı tirkeldi, budan bólek 46 adam indetke qaıta dýshar bolǵan. Jalpy, pandemııa kezeńinde barlyǵy 3 403 994 PTR zertteý júrgizildi.
Keshegi derek boıynsha MSAK uıymdarynda 4 294 pasıent koronavırýs ınfeksııadan emdelip jatyr. Onyń men 833-i – balalar, 179-y – júkti áıelder. Birinshi komponentpen 534 360 adam, ekinshi komponentpen 515 968 adam vaksına aldy. Revaksınadan ótkenderdiń sany – 156 996.
Osy oraıda Nur-Sultandaǵy №3 qalalyq emhananyń terapevt-dárigeri Ǵalııa Bahtııarqyzy vırýstan qorǵanýdyń birneshe jolyn atap ótti.
«Koronavırýs sııaqty respıratorlyq vırýstar, adam aǵzasyna kóz, muryn nemese tamaq arqyly quramynda vırýsy bar shyrysh nemese tamshylardyń túsýi arqyly taralady. Kóbinese taralý qol arqyly oryn alady. Qol – vırýstyń bir adamnan ekinshi adamǵa taralýynyń eń jıi kezdesetin joldarynyń biri. Pandemııa kezinde vırýs taralýynyń aldyn alýdyń eń qoljetimdi, qarapaıym jáne mańyzdy tásilderiniń biri – qoldy sabynmen jıi jýý. Jáne mindetti túrde qoǵamdyq oryndarda maska taǵý. Koronavırýstyń taralýyn taǵy da qalaı boldyrmaýǵa bolady? Ol úshin túshkirý men jótelýdiń durys ádebin saqtańyz: jótel nemese túshkirý kezinde aýyzdy jáne muryndy búgilgen shyntaqpen nemese maılyqpen qalqalańyz, paıdalanǵan maılyqty dereý tastańyz jáne qoldy jýyńyz. Betińizge – aýyzǵa, murynǵa, kózge qol tıgizbeńiz. Áleýmettik qashyqtyqty saqtańyz: qol alysý, qushaqtasý nemese súıisý, birge tamaqtaný, bir ydysty, keselerdi jáne súlgilerdi birge paıdalanýdan aýlaq bolyńyz. Sýyq tıgen nemese tumaý belgileri bar adamdarmen tyǵyz baılanystan aýlaq bolyńyz. Eger joǵary temperatýra, jótel nemese tynys tarylý belgileri bolsa, ýaqtyly medısınalyq kómekke júginińiz», dedi Ǵ.Bahtııarqyzy.
Sonymen qatar ol vaksınanyń mańyzdylyǵyn aıta kele, sozylmaly aýrýlary bar adamdar dárigerlermen keńese otyryp birinshi bolyp vaksına alý kerek ekenin alǵa tartty.
«Vaksına osy vırýstan qorǵaıtyn medısınanyń oılap tapqan eń úlken jetisti deýge bolady. Sol arqyly biz ózimizdiń, jaqyndarymyzdyń densaýlyǵyn saqtaı alamyz. Ol keıde densaýlyǵymyzdy qorǵap qana qoımaı, ólimnen de alyp qalýy múmkin. Ekpe alý arqyly adamdar qalypty ómirge qaıta oralady. Vaksınanyń negizgi maqsaty – ınfeksııanyń aldyn alý emes, aýrýdyń aýyr aǵynynan qorǵaý. Ol aýyryp, ajalǵa aparý saldaryn azaıtady. Immýnıtet qalyptastyrady. Álem boıynsha júrip jatqan vırýs ásirese sozylmaly aýrýlary bar adamdar úshin óte qaýipti. Sondyqtan osyndaı belgisi bar azamattar dárigerlermen keńese otyryp birinshi bolyp vaksına alýy kerek», dedi maman.
Sondaı-aq jaqynda Qazaqstannyń bas sanıtar dárigeri Aıjan Esmaǵambetova óńir «qyzyl aımaqqa» kirgen jaǵdaıda bilim berý salasynda engiziletin shekteýler jaıynda aıtty.
«Birinshiden – bul sanıtarlyq-zararsyzdandyrýdy kúsheıtý, tazalyq júrgizý jıiligin arttyrý, kabınetterdi jeldetý, aýany zararsyzdandyrý. Sonymen qatar kireberiste súzgi ornatyp, pedagogter men qyzmetkerlerdiń dene qyzýyn ólsheý qolǵa alynady», dedi A.Esmaǵambetov
Onyń aıtýynsha, qashyqtan oqytý formaty engizilmeıdi. Degenmen «qyzyl aımaqqa» engen óńirlerde mádenı, tárbıe is-sharalaryn, synyp jáne ata-analar jınalystaryn ótkizýge tyıym salynady.
«Balabaqshalarda toptardy biriktirý arqyly ótkiziletin is-sharalarǵa tyıym salynady. Mektepterde joǵary, orta jáne tómengi synyp oqýshylaryn bólekteý júrgizilýi múmkin. Bul olardy múmkindiginshe bir-birimen kezdespeýi úshin jasalady. Esterińizde bolsa, bastaýysh jáne joǵary synyptar úshin bólek kireberis uıymdastyrǵan edik», dedi bas sanıtar dáriger.
