Kosovolyq serbter eldiń soltústiginde Serbııamen aradaǵy shekara beketterin japqan Elde sırenalar daýysy estilgen. Baspasózdegi habarlarda Kosovoda sırenalar estilgeni aıtylsa, kosovolyq serbterdiń osy dybystarǵa baılanysty shekarany jaýyp tastaǵany habarlandy. Erteńine aımaqqa NATO-nyń Kosovo kúshterine (KFOR) tıesili eki kólik kelgeni habarlandy.
Kosovo polısııasy dırektorynyń orynbasary Besım Hotı óz málimdemesinde kosovolyq serbter kóliktermen shekaraǵa tosqaýyl qoıǵanyn, polısııa kúshteriniń Brnıak pen Iаrıne shekara qaqpalaryn japqanyn málimdedi. Sonymen qatar Kosovo polısııasy keıbir jerlerde oq daýystary estilgenin, olardyń keıbireýleri polısııa kúshterine baǵyttalǵanyn, biraq eshkim zardap shekpegenin alǵa tartty.
Kosovolyq baspasóz betterinde alban tekti azamattardyń shabýylǵa ushyraǵany jáne bul shabýyldarda kólikterdiń zaqymdalǵany týraly aqparattar tarady. Úkimet Kosovodaǵy serbterdiń shekara ótkelderin jabý áreketin aıyptaǵanyna eskere otyryp, muny Belgrad tarapy daıyndaǵan dep kúdiktenip otyr. Kosovo premer-mınıstri Albın Kýrtı eldegi agressıvti áreketterdi Serbııa josparlaǵanyn jáne onyń arandatýshylyǵymen jasalǵanyn, kóterilisterdiń basty jaýaptylarynyń biri Serbııa prezıdenti Aleksandr Výchıch pen Serbııa úkimeti keńsesiniń dırektory Petar Petkovıch ekenin alǵa tartady.
«Serbııanyń zańsyz qurylymdary burynǵydan da agressıvti qylmystyq toptarǵa aınaldy. Bul bizdiń el úshin ońaı emes, óıtkeni olardy soltústik kórshimizdiń búkil memlekettik qurylymdary qoldap otyr. Keshe ondaǵan óreskel jáne anyq zań buzýshylyqtar boldy. Biz halyqaralyq uıymdardy, EO men NATO-ny Belgrad ashyq túrde arandatyp, arnaıy daıyndap qarjylandyrǵan Kosovonyń soltústigindegi qylmystyq toptardyń zorlyq-zombylyǵy men agressııasyn aıyptaýǵa shaqyramyz», dedi Kýrtı.
Serbııa Qorǵanys mınıstrligi Kosovodaǵy ahýalǵa aralaspaǵanyn jáne áleýmettik medıadaǵy jalǵan aqparatqa senýge bolmaıtynyn málimdedi. Serbııa prezıdenti Aleksandr Výchıch oqıǵaǵa qatysty málimdeme jasap, kosovolyq serbter budan bylaı qýdalaýǵa shydamaıtynyn ashyq aıtty. Prezıdent Výchıch óz sózinde «Biz beıbitshilikti qalaımyz, biraq biz berilmeımiz», dep ortaǵa beıtarap pikir usyndy. Degenmen óz eliniń qaqtyǵys týdyratyn jáne qaqtyǵysty qalaıtyn tarap emes ekenin atap kórsetken Výchıch: «Serbııa Slobodan Mıloshevıch pen Borıs Tadıch kezindegideı ońaı jeńetin el emes» ekenin eskertýdi umytpady.
Serbııanyń buǵan deıin mundaı kúrdeli jáne qıyn jaǵdaıda bolmaǵanyn atap kórsetken Výchıch óz sózinde Prıshtına ákimshiligin ózderin únemi qurban retinde kórsetýge tyrysatynyn tilge tıek etti. Sonymen qatar Výchıch Kosovodaǵy albandardyń premer-mınıstr Albın Kýrtıdiń kesirinen qıyndyqtarǵa tap bolǵanyn jáne Batystyń Kosovoda bolýy múmkin qaqtyǵysty qalamaıtynyn aıtty.
Eýroodaq Kosovodaǵy oqıǵalarǵa alańdaýlyshylyq tanytyp, oqıǵaǵa qatysty málimdeme jasady. EO Kosovonyń soltústigindegi oqıǵadan soń taraptardy Brıýsselge atalǵan máseleni talqylaýǵa shaqyrdy. Serbııa men Kosovo arasyndaǵy barlyq máseleniń dıalog arqyly sheshilýi kerektigin atap kórsetken Eýroodaq komıssııasynyń ókili Pıter Stano «Eýroodaq eki tarapty da sheshim tabý jáne mundaı shıelenisterdiń qaıta bolýyna jol bermes úshin Brıýsselde aldyn alý joldaryn talqylaýǵa shaqyrady» dedi. Sonymen qatar Stano turaqtylyq pen qaýipsizdikke qaýip tóndiretin jáne barlyq azamattardyń erkin júrip-turýyna kedergi keltiretin kez kelgen kelisilmegen jáne birjaqty áreketti dereý toqtatý kerek dep málimdedi.
Osydan keıin Kosovo úkimeti eldegi serbterge ulttyq nómirler men jeke kýálikterin ózgertý týraly engizgen sheshimin bir aıǵa keıinge qaldyryp, 1 qyrkúıekke deıin shegerdi. Jalpy, Kosovo men Serbııa arasynda túrli sebeptermen shıelenister jıi bolyp turady. Negizgi sebepterdiń biri – 2008 jyly táýelsizdigin jarııalaǵan Kosovony Serbııanyń áli kúnge deıin óz terrıtorııasy dep sanaýynda.
