Baıraqty básekeniń alǵashqy aınalymynda Ekvador quramasynan 2:1 esebimen jeńilip qalǵan jerlesterimiz ekinshi kezeńde 2016 jylǵy álem chempıony – Argentınamen sheberlik baıqasty. Asa tartysty ótken kezdesýde qazaqstandyq jasóspirimderdiń mereıi ústem bolyp, álem chempıonatyndaǵy tuńǵysh jeńisine qol jetkizdi.
Birinshi matchta Danıel Tazabekov Bendjamın Chelııany tize búktirdi. Jerlesimiz eki sette – 7:5, 6:2 esebimen jeńiske jetti. Sodan keıin Zańǵar Nurlanuly Argentına quramasynyń kóshbasshysy Dante Paganımen oınady. Birinshi partııada Zańǵar 6:2 esebimen basym túskenimen, qalǵan eki sette argentınalyq sátti óner kórsetti – 6:1, 6:1. Match taǵdyry juptyq básekede sheshildi. Damır Jalǵasbaı men Danıel Tazabekov Dante Paganı – Bendjamın Chelııany eki sette tize búktirdi – 6:1, 6:4. Qorytyndy esep – 2:1. Otandastarymyz keshe byltyrǵy álem chempıonatynyń jeńimpazy Italııamen kezdesti.
