Departament bastyǵynyń orynbasary, azamattyq qorǵaý polkovnıgi Ashat Erjanovtyń málimetine súıensek, ótken jyly 28 adam sýǵa batyp ketken. Júrgizilgen taldaýǵa sáıkes sýǵa ketýdiń birneshe sebebi anyqtalyp otyr. Máselen, tórt adam tyıym salynǵan jerde sýǵa túsken. Sýǵa qulap ketken 10 adam keri shyqpaı qalǵan. Mas kúıde sýǵa túsken tórt adam jantásilim etken. Al eresekterdiń qaraýynsyz júrgen 10 bala sýǵa batyp ketti. Qutqarýshylar alty adamdy sýdan alyp shyqty. Onyń ishinde tórt bala bar.
– Bizdiń maqsatymyzdyń biri – jaz mezgilinde sý aıdyndaryndaǵy adam óliminiń aldyn alý. Osy maqsatta tótenshe jaǵdaılar departamenti ókilderi polısııa qyzmetkerlerimen, jergilikti ákimdik ókilderimen birlesken kúndelikti úgit-nasıhat jumystaryn júrgizip keledi. Oǵan kún saıyn 273 adam, 44 avtokólik pen júzý quraldary tartylady. Sýǵa túsý maýsymy bastalǵaly beri Atyraý qalasyndaǵy, Jylyoı men Qurmanǵazy aýdanyndaǵy úsh sýdan qutqarý stansasynda jedel-qutqarý jasaǵynyń qyzmetkerleri táýlik boıy kezekshilikti atqaryp jatyr. Bıyl oblystaǵy sý aıdyndarynyń 238 ýchaskesine sýǵa túsýge tyıym salyndy. Sýǵa túsýge ruqsat etilgen, tyıym salynǵan oryndar 2gis qosymshasyna engizildi. Oqys oqıǵanyń aldyn alý úshin turǵyndar nazaryna qarapaıym qaǵıdalardy usyndyq. Máselen, «Sýǵa túsýge tyıym salynady» degen belgisi bar aýmaqta sýǵa túsýge, júzý shekarasy kórsetilgen qalqyma belgilerdi kesip ótýge, kemege, qaıyqqa, basqa da quraldarǵa jaqyndaýǵa bolmaıdy. Buǵan qosa mas kúıinde tekserilmegen, arnaıy jabdyqtalmaǵan aýmaqta sýǵa túsýge, júzýge arnalmaǵan zattarmen júzýge tyıym salynatynyn eskerý qajet. Qaıyqtardan, jaǵajaılardan, beketterden, osy maqsattarǵa beıimdelmegen basqa da oryndardan sýǵa sekirmeý kerek. Sý qoımasynda qaýipsizdik belgilerin óz betinshe alyp tastaýǵa, búldirýge nemese ornatýǵa tyıym salynady, – deıdi Ashat Erjanov.
Onyń aıtýyna qaraǵanda, bıyl sýǵa ketýdiń alǵashqy deregi 22 qańtarda tirkelgen. Atyraý qalasynda turatyn 9 jasar bala «Peretaska» kanalynda muz astyna túsip ketip, shyǵa almaı qalǵan. Bir kúnnen soń onyń máıiti sýdan tabyldy.
Al 21 sáýirde Qyzylqoǵa aýdanynyń Tasshaǵyl aýylynan 21 jastaǵy jigit mal izdeýge shyǵyp, iz-túzsiz joǵalǵan. Áýeli onyń minip ketken atynyń óleksesi Oıyl ózeninen shyqty. Keıin jas jigittiń ózenge batyp ketkeni anyqtaldy. Jylyoı aýdanynyń Jem aýyldyq okrýginde 4 maýsymda 2009 jylǵy jasóspirim arnaıy jabdyqtalmaǵan jerde sýǵa túsip, batyp ketti. Tótenshe jaǵdaılar departamentiniń qyzmetkerleri 16 maýsymda «Atyraý» deneshynyqtyrý-saýyqtyrý kesheni mańyndaǵy jaǵajaıda ata-anasynyń qaraýynsyz sýǵa túsip júrgen 20-dan astam kámeletke tolmaǵan balany anyqtady.
Jyl basynan beri óńirdegi sý aıdyndarynda 14 adamnyń sýǵa batyp ketkeni anyqtalyp otyr. Onyń ishinde kámeletke tolmaǵan bes bala bar. Máselen, Atyraý qalasynda – 2, Jylyoı aýdanynda – 2, Qyzylqoǵa aýdanynda – 2, Qurmanǵazy aýdanynda – 2, Inder aýdanynda – 2, Mahambet aýdanynda 4 adam sýǵa ketti.
– Statıstıkaǵa sáıkes sý aıdyndaryndaǵy jazataıym oqıǵalardyń 95 paıyzy mas kúıinde sýǵa túsýdiń, júzý qabiletin asyra baǵalaýdyń saldarynan bolady. Al balalar arasynda oqys oqıǵaǵa tentektik pen ata-analardyń salǵyrttyǵy sebepker ekenin jasyra almaımyz. Buǵan qosa sýǵa túsken kezde densaýlyqtyń kúrt nasharlaýy men býynnyń qurysýy sekildi sebepter de áser etetini bar, – deıdi departament bastyǵynyń orynbasary A.Erjanov.
Bıyl Atyraý qalasynyń aýmaǵynda 28 jaǵajaıǵa sýǵa túsýge tyıym salyndy. Mundaı jaǵajaılar Jumysker, Qyzylbalyq, Damby, Talǵaıran, Geolog, Tomarly, Aqsaı, Aqjar, Peretaska, Erkinqala, Qaraózek, Bereke eldi mekenderinde, Balyqshy shaǵyn aýdanyndaǵy stadıon tusynda, Beıbarys kóshesi arqyly ótetin kópir mańyndaǵy eski parom, Kókarna aýylyndaǵy 5-ótkelde, Rembaza, Avangard shaǵyn aýdandarynda, B.Nysanbaev, M.Halelov, О́.Atambaev, Temirhanov kóshelerinde, Kottedjnyı qalashyǵy men Sokolınsk kanalynda ornalasqan. Soǵan qaramastan turǵyndar sý aıdyndarynyń arnaıy jabdyqtalmaǵan tusynda sýǵa túsýdi toqtatar emes. Kópshiligi mundaı árekettiń sońy orny tolmas ókinishke uryndyraryn eskermeıdi.
Máselen, 31 shildede Mahambet aýdanynyń ákimi Ortaqshyl aýylyna baryp, Jaıyq ózenine sýǵa túsken. Biraq sýdan keri shyqpaı qaldy. Jergilikti atqarý organynda tájirıbe jınaǵan ákim 40 jasqa endi tolar edi. Alaıda ajaly sýdan bolyp, taǵdyry kilt úzildi. Onyń arnaıy jabdyqtalmaǵan jerde sýǵa túskeni anyqtalyp otyr.
Atyraý oblysy
