Áleýjelide Petropavl qalasynda múgedektigi bar qyzdy úsh er adamnyń zorlaǵany jaıynda aqparat tarady.
Oqıǵa 3 tamyzda bolǵan. Zardap shekken qyzdyń tanysy habarlaǵandaı, ol boıjetkenniń aqyl-esiniń kemistigi bar, anasy da aýyrady. Kópqabatty úıdiń aýlasynda átkenshek teýip otyrǵan ony kórshileriniń biri qasyndaǵy úıge, jalǵa beriletin páterge alyp ketken. Ol jerde taǵy eki er adam bolǵan.
«Ol tańerteń meniń aldymnan shyqty, ony urǵan. Ne bolǵanyn aıtyp berdi. Polısııaǵa baryp aryz jazdy. Saraptamadan ótti», deıdi zardap shegýshiniń tanysy.
Soltústik Qazaqstan oblysynyń Polısııa departamenti bul derekke qatysty túsinik berdi.
«3 tamyz kúni Petropavl qalalyq polısııa basqarmasyna Abaı kóshesindegi jalǵa beriletin páterlerdiń birinde oblys ortalyǵynyń 32 jastaǵy turǵyny zorlanǵany týraly habarlama tústi. Bul fakti QR QK 120-baby 2-bóligi, 1-tarmaǵy «Zorlaý» boıynsha sotqa deıingi tergep-tekserýlerdiń biryńǵaı tizilimine tirkeldi. Polısııa SQO-nyń 48 jáne 32 jastaǵy eki turǵynyn anyqtady. Qazirgi ýaqytta atalǵan derek boıynsha tıisti saraptamalar taǵaıyndaldy, qajetti tergeý amaldary júrgizilip jatyr. Onyń nátıjesi boıynsha zańdy prosessýaldyq sheshim qabyldanady. Qalǵan aqparat QR QPK 201-babyna sáıkes jarııa etilmeıdi», delingen habarlamada.
