Qorǵanys vedomstvosynyń basshysy eki márte Keńes Odaǵynyń Batyry Talǵat Bıgeldınovtyń erlik joly, onyń Qazaqstannyń azamattyq jáne áskerı avıasııasyn damytýǵa, eldiń mádenı nysandary men ındýstrııalyq ınfraqurylymyn salýǵa qosqan baǵa jetpes úlesin atap ótti.
«Avıasııa general-maıory Talǵat Jaqypbekuly Bıgeldınovtyń ómir joly – HH ǵasyrdaǵy surapyl soǵystyń oshaǵynan ótken batyrlyqtyń, qajymas qaırattyń, tabandylyqtyń aıqyn úlgisi. Biz, batyrdyń izin basyp kele jatqan urpaq jáne jas býyn qazaq halqynyń batyr ulynyń janqııarlyǵyn maqtan etip, erligin jadymyzda máńgi saqtaımyz», dep atap ótti Qorǵanys mınıstri.
Osy kúni Aqtóbe qalasynyń Áýe qorǵanysy kúshteri áskerı ınstıtýtyndaǵy Áskerı dańq murajaıynda ekspozısııa ashyldy. Onda Bıgeldınovtar otbasynyń jeke muraǵatynan alynǵan fotosýretter, batyr ómiriniń keı sátterinen estelik-jádigerler qoıylǵan.
Áýe qorǵanysy kúshteri áskerı ınstıtýty basshylyǵynyń aıtýynsha, murajaı aqtóbelikterdi jáne Ortalyq Azııadaǵy jalǵyz áskerı ushqyshtar daıyndaıtyn ınstıtýttyń kýrsanttaryn tárbıeleýge yqpal etedi.
Qazaqstan áskerı avıasııasynyń dańqty ushqyshynyń qurmetine avıasııalyq bazalarda, áskerı bólimder men oqý oryndarynda is-sharalar uıymdastyryldy. Qazaqtyń batyr ulyna Mı-35M, Mı-8, Mı-171Sh áskerı avıasııasynyń tikushaqtarynda jáne Sý-30SM, Sý-27, Sý-25, L-39 áskerı ushaqtarynda ushý jattyǵýlaryn arnady.
Sonymen qatar, bundaı sharalar Qarýly kúshterdiń Ulttyq áskerı-patrıottyq ortalyǵynda da ótedi. Onda Qorǵanys mınıstrliginiń áskerı orkestri men ansambli ujymdarynyń atsalysýymen uıymdastyrylǵan saltanatty jıyn men merekelik konsert bolady.
«Ǵasyrlyq mereıtoıǵa oraı Áýe qorǵanysy kúshteriniń bas qolbasshysy avıasııa general-leıtenanty Nurlan Ormanbetov Qarýly kúshterdiń Ortalyq áskerı-tarıhı mýzeıine elordada ornatylǵan Talǵat Bıgeldınov eskertkishiniń shaǵyn kóshirmesin tapsyrady. Salmaǵy 25 keliden asatyn jarty metrlik músin qoladan quıylǵanyn aıta ketken jón», dep jazylǵan habarlamada.
