«Imıdjdik ónim satatyn saýda núktelerin ashý – mádenı qaýymdastyqty qalyptastyryp qana qoımaı, klassıkalyq teatr ónerine kórermenderdiń qyzyǵýshylyǵyn arttyrýdaǵy is-sharalar bastamasy, – degen «Astana Opera» teatry dırektorynyń orynbasary Aıjan Qurmanǵalıeva odan ári, – biz úshin kórermendermen baılanystyń mańyzy zor. Ol ónersúıer qaýymmen múddemizdiń bir bolýyna múmkindik beredi. Osy maqsatta biz «Dostar klýby» jobasyn júzege asyryp, kórermenderge ózara qarym-qatynasymyz týraly ortaǵa salýdy usynamyz. Elorda ákimdiginiń qoldaýymen ashylatyn art-dúkender ónerdi jaqsy kóretin qaýymdy teatrǵa bir taban jaqyndatyp qana qoımaı, onyń qaıtalanbas rýhyn sezindirip, ádemi jasalǵan kórkem syılyqtarǵa ıe bolýǵa múmkindik syılaıdy».
Teatrdyń marketıng departamentiniń mamandary taýarlar assortımenti úlken ekenin jáne onyń únemi jańartylatynyn atap ótti. Sonymen bekzat ónerdi jaqsy kóretin qaýym atalǵan teatr ǵımaraty men elordalyq áýejaı jáne «Kerýen» saýda oıyn-saýyq ortalyǵynda ashylatyn art-dúkenderden Nur-Sultan qalasy men «Astana Opera» emblemalary stıldi salynǵan ári bederlengen sporttyq kostıým, bas kıim, fýtbolka, shopper-sómke, oramal, bloknot, qalam, saptyaıaq, organaızerler men basqa da kóptegen taýardy satyp alady.
