Qazaqy qarapaıym uǵymmen aıtsaq, sanaǵa sińgen dúnıeniń bári – ıdeologııa. Al búginde sanamyzǵa ne sińbeı jatyr... Jemqorlyq, baılyq, urlyq-qarlyq, aldaý-arbaý, kisi aqysyn jeý... Osy jaǵymsyz ádet keıinge jastardyń sanasyna sińip ketpese eken dep alańdaısyz.
Keńes Odaǵy kezinde ıdeologııa qýatty qarý boldy. Oǵan olar aldymen zııaly qaýymdy, óner adamdaryn tartty. Máselen, bir úlken aýqymdy is-sharany qolǵa alǵanda, ony halyqqa jetkizý úshin kórkem shyǵarmalar, mýzykalyq týyndylar jazdyrdy. Sonyń nátıjesinde, jaqsy dúnıeler de ómirge keldi.
Belgili jazýshy, marqum Dıdahmet Áshimhanuly aǵamyzdyń erterekte «Túrkistan» gazetinen «Sanadaǵy shyrmaýyq» atty maqalasyn oqydym. Sonda qalamger: «Táýelsizdik alǵannan bergi jyldarda bizdiń aramyzda eń kóp talqyǵa túsip júrgen sózderdiń biri – osy ıdeologııa. Ony bireýler bar deıdi, bireýler joq deıdi. «Joq» degen árıne, bos sóz. Ideologııa bar, bar bolǵanda qandaı? Jáne Keńes Odaǵynda negizinen bir-aq ıdeologııa, kommýnıstik ıdeologııa júrse, búginde bizdiń aramyzda ıdeologııanyń birneshe túri ómir súrip jatqandaı» deıdi de, elimizde óris alǵan túrli ıdeologııalarǵa naqty anyqtama beredi.
Shyn máninde, ıdeologııasyz memleket bolmaıdy. Negizinen, halyqty baǵyttap, jetelep otyratyn memlekettik ıdeologııanyń orny bólek. Ol maqsatty-josparly túrde iske asady. О́ıtkeni onyń barlyǵy bir tártipke baǵynady. Tártip bar jerde júıeli jumys júredi. Al ulttyq ıdeologııanyń tizgini qashannan ult zııalylarynyń qolynda bolǵan. Bizde halyqqa syıly, bedeldi, sózi ótimdi zııaly azamattar jeterlik. Osyndaıda ótken ǵasyrdaǵy sekseninshi jyldardyń sońynda qazaq telearnasyna sony ózgeris ákelgen aıtýly synshy, memleket jáne qoǵam qaıratkeri, marqum Saǵat Áshimbaev aǵamyz júrgizgen «Paryz ben qaryz» atty baǵdarlamasy esime túsedi. Men sol kezde bala bolsam da, osy baǵdarlamany ata-anammen birge kórdim. Sonda Saǵat aǵa halqymyzdyń tarıhy, tili, dini, rýhanııaty, mádenıeti týraly rýhtanyp sóıleıtin. Sol rýhty sózderimen ol kisi qanshama kórermenniń sanasyn oıatyp, ulttyq ıdeologııanyń dánin septi. Bizge búgin dál osyndaı ult máselesin eshnárseden irikpeı, búkpeı aıtatyn parasatty tulǵalar men baıypty baǵdarlamalar qajet ekendigin sezinemiz.
