«El birligi - Jańa Qazaqstan» jobasy 2022-2025 jyldar aralyǵynda kezeń-kezeńmen iske asyrylady. Jobanyń maqsaty - óńir turǵyndaryna mádenı qundylyqtardyń qoljetimdiligin qamtamasyz etý, óńirlerdegi shyǵarmashylyq ujymdar men artısterdi qoldaý, elimizdiń ulttyq qundylyqtaryn dáripteý.
«Memleket basshysynyń 2022 jylǵy naýryzdaǵy Qazaqstan halqyna Joldaýynda atap ótkendeı, Alash qozǵalysynyń ortalyǵy bolǵan Abaı oblysynyń ortalyǵy Semeı qalasy, halqymyzdyń qanshama uly tulǵasy dúnıege kelgen kıeli óńirdi jańǵyrtý ekonomıkalyq qana emes, mádenı-rýhanı mańyzǵa ıe. Sondyqtan gastroldyq maýsymdy osy kıeli óńirden bastamaqshymyz», dep atap ótti Roza Baǵlanova atyndaǵy «Qazaqkonsert» memlekettik konserttik uıymynyń dırektory Aqtoty Raıymqulova elordada ótken baspasóz máslıhatynda.
Gastroldik konsertterdiń shyǵarmashylyq quramynda «Qazaqkonserttiń» solısteri: Qazaqstannyń halyq ártisi, Qazaqstannyń Eńbek Eri Roza Rymbaeva, Qazaqstannyń eńbek sińirgen ártisi Aıjan Nurmaǵambetova, Qazaqstannyń eńbek sińirgen qaıratkerleri Erlan Rysqalı, Raýshan Orazbaeva, Azamat Jyltyrkózov, Medet Chotabaev, Saltanat Ahmetova, Janna Orynbasarova, QR Mádenıet salasynyń úzdigi Perızat Turarova, «Daryn» memlekettik jastar syılyǵynyń laýreattary Asqar Muqııat, Ardaq Eleýsiz, halyqaralyq jáne respýblıkalyq baıqaýlardyń laýreattary Daryn Qudaıbergen, Álibek Álmadıev, Áıgerim Altynbek, Saltanat Meńdiǵalıeva, Dıdar Ábdihalyq.
«El birligi - Jańa Qazaqstan» jobasynyń resmı bastalýy osy jyldyń tamyz aıyna josparlanǵan.
