Árıne, bizdiń pikirge qosylý, qosylmaýyńyz óz quzyryńyzda… Tek biz mysalǵa alǵan kartınaǵa qarap, sol oıǵa baılanaryńyzǵa senimdimiz. Sýretkerdiń sezimin áldılegen, kóńilin tolqytqan tústerdiń tańǵajaıyp qosyndysy. Bul qylqalam sheberi Kamıla Japalovanyń «Mahabbat áýeni» kartınasy. Maıly boıaýmen jazylǵan mahabbat hıkaıasy.
Kompozısııada otaǵasy men onyń báıbishesi beınelengen. Qazaqy kıimde, bolmys-bitimi ulttyń salt-dástúrinen taǵan tartyp tur. Qara jerge quraq kórpe jaıyp, qos ǵashyq qobyz únimen qýat alýda. Qymyz usynǵan qyzdyń kıimine nazar salyńyzshy. Eski dáýirdiń kelbetin kóz aldyńyzǵa ákeledi. Munda ıbalylyq, meıirimdilik, tazalyq, tektilik bar. Jigittiń de ón boıynan sony kóremiz.
Aınala túgeldeı saǵymǵa ulasqandaı, tirshilik tolqyndaı terbelip tur. Quddy qos ǵashyqqa qosylyp tabıǵat án aıtyp turǵandaı. Qazaqy oıý órnekter maıda jeldeı burala ornalasqan. Áıeldiń qolyndaǵy tostaǵannan bólek taǵy eki tostaǵan berilgen. Qonaq kelse, qushaǵy ashyq qazaqtyń peıilin elestetedi. Bir-birine taqala jaıǵasqan ekeýdiń qobyz únine balqyp otyrǵany anyq.
Avtor kartınany «Mahabbat áýeni» dep ataýy beker emes. Kenep betinde shynymen mýzyka bar. Ony oıly oqyrman birden baıqaıdy. Qońyr dalanyń qushaǵynda qońyr áýenge teńizdeı terbelgen er men arýdyń bir-birine degen súıispenshiligi kózge ottaı basylady. Solarmen birge barlyq álem terbelip turǵandaı. Súıgenderdiń qashanda óz áni, óz taǵdyr-táleıi bolýy zańdylyq.
