Medısınalyq ortalyq aýrýhanasynyń jańa blogi eń joǵary halyqaralyq standarttarǵa sáıkes salynǵan, sondaı-aq pýlmonologııa jáne nefrologııa, gastroenterologııa jáne endokrınologııa, nevrologııa, revmatologııa jáne kardıologııa baǵyttary boıynsha terapevtik qyzmet kórsetýge mamandandyrylǵan. Sonymen qatar munda kúndizgi stasıonar, ıntensıvti terapııa blogi, ınsýlt, mıokard ınfarktisi, kardıohırýrgııa, neırohırýrgııa jáne ortopedııalyq operasııalardan keıingi naýqastardy ońaltý blogi ornalasady.
«Osylaısha, MOA bazasynda 200 terapevtik jáne 200 hırýrgııalyq orynmen qamtylǵan kópbeıindi stasıonar jasaqtalyp jatyr. Bul naýqastardy qabyldaý men medısınalyq kómek kórsetýdi eki ese arttyrýǵa múmkindik beredi. Jańa ǵımarat paıdalanýǵa berilse, biz jylyna 16 myń adamǵa deıin qyzmet kórsetip, pasıentterdiń muqtajdyǵyn qanaǵattandyra alamyz», deıdi Medısına ortalyǵy aýrýhanasy dırektorynyń emdeý isi jónindegi orynbasary Raýshan Qarabaeva.
Jańa korpýstyń dıagnostıkalyq bazasy joǵary sanatty eksklıýzıvti tehnologııalardan turady. Mundaı zamanaýı ozyq qondyrǵylardyń Qazaqstanda, keıbiriniń TMD-da balamasy joq.
«Máselen, mınýtyna 640 kesindi jasaıtyn jáne tinniń árbir mıllımetrine deıin zertteýge múmkindik bere otyryp, dálme-dál nátıje kórsetetin kompıýterlik tomograf ornatyldy. Bul quraldyń ázirge Qazaqstanda balamasy joq. Al burynǵy qoldanystaǵy tomograf ári ketse mınýtyna 256 keskin jasaıtyn. Tomosıntez fýnksııasy bar mammograf bolsa, sút beziniń qatersiz isigin qaterli isikten ajyratýǵa múmkindik beredi. Taǵy bir erekshe zertteý – qaraýyldaýshy lımfa túıinderin radıoaktıvti túrde anyqtaý ádisi. Bul qaterli isikke shaldyqqan áıelderge jasalatyn operasııanyń jeńil ótýine kómektesedi. Budan ózge de ózgeshe apparattar barshylyq. Ustamalary bar naýqastardy kúndelikti neırofızıologııalyq zertteý – epılepsııanyń sebebin dıagnostıkalaıdy jáne ustama aýrýynyń dendeýine túrtki bolatyn mı qyrtystaryn anyqtaıdy. Munyń barlyǵy bizdiń aýrýhananyń dıagnostıkalyq múmkindikterin aıtarlyqtaı keńeıtip, eń qıyn aýrýlardy anyqtaýǵa múmkindik beredi», dedi Raýshan Qarabaeva.
PIB Medısınalyq ortalyǵy aýrýhanasynyń jańa blogi bilikti dárigerlermen 100% qamtamasyz etilgen. Dıagnostıkalyq jabdyqtardy paıdalanatyn mamandar aldyn ala tańdalyp, alys-jaqyn shetelderdiń úzdik emhanalarynda tájirıbeden ótti.
