Keıbir ata-analardan mektepterde mektep formasyna qoıylatyn talaptar, ıaǵnı tús, kıim dızaıny boıynsha talaptar naqty jetkizýshilerge nemese óndirýshilerge sáıkes jasalǵany týraly shaǵymdar túsken. Osyǵan baılanysty keıbir óńirlerde bilim basqarmalary ata-analar qaýymdastyǵy jáne qamqorshylyq keńesterimen kelise otyryp, ár mektep óz talaptaryn qoımaýy úshin óńirde biryńǵaı tústi engizýdi, sol arqyly ata-analardyń tańdaýyna shekteý qoıý jóninde sheshim qabyldady.
«Bul rette ata-analardyń nazaryn talaptardyń ózi ózgermegenine aýdarǵymyz keledi. Mysaly, eger oqýshy mektepke satyp alynǵan nemese buryn sol mekteptiń Qamqorshylyq keńesi bekitken aǵa-ápkelerinen qalǵan formany kıip kele alady. Ata-analardyń ótinishterinen keıin birneshe bilim basqarmasy qamqorshylyq keńestermen birlesip, oblys boıynsha mektep formasynyń birkelki túsin belgileýge sheshim qabyldady. Barlyǵy qoıý kók tústi tańdady. Biraq bul balalardy shektemeıdi, ıaǵnı olar burynnan bar mektep formasymen kele alady. Oblys boıynsha mektep formasynyń biryńǵaı túsin belgileýge toqtala ketsek. Bul naqty jetkizýshilerge talap qoıý táýekelderin barynsha azaıtyp, qoljetimdi formany (naryqta nemese dúkende) satyp alýǵa múmkindik beredi. Sondaı-aq oqý jylyna deıin ataýly áleýmettik kómek alatyn nemese jan basyna shaqqandaǵy ortasha tabysy eń tómengi kúnkóris deńgeıinen tómen, jetim jáne ata-anasynyń qamqorlyǵynsyz qalǵan, tótenshe jaǵdaıǵa tap bolǵan otbasylardan shyqqan 418 myń balaǵa kómek kórsetiletinin atap ótemin. Olarǵa mektep formasy men keńse taýarlaryn satyp alý úshin «Jalpyǵa mindetti bilim berý» qorynan qoldaý kórsetiledi», dep túsindirdi mektepke deıingi jáne orta bilim komıtetiniń tóraǵasy Gúlmıra Kárimova.
