Sýret BQO PD baspasóz qyzmetinen alyndy
Tamyzdyń 6-sy kúni keshki saǵat 19:55 shamasynda Oral qalasyndaǵy Isataı-Mahambet kóshesiniń boıyndaǵy «Rahat-Lýkým» karaoke-meıramhanasynda belgisiz eki adam 1973 jyly týǵan kásipker azamatty pyshaqtap ketkeni týraly aqparat áleýmettik jelige tez tarady. Alǵan jaraqatynan Atoıan atyndaǵy stadıon mańynda qaıtys bolǵan kásipkerdiń esimi Erkin Muqanǵalıev ekeni, «Gúlshetaı» (burynǵy «Astorııa» meıramhanasy) kafesi men «Mahabbat» meıramhanasynyń ıesi bolǵany aıtyla bastady.
Kóp keshikpeı-aq beınebaqylaý kamerasynan oqıǵanyń qalaı bolǵany anyq kórindi. Qara kıim kıgen qos jigit pen kásipker bir ústeldiń basynda áýeli qarama-qarsy otyrady. Kúdiktiniń biri ornynan turyp, kásipkerdiń janyna tyqsyra jaıǵasady, kásipker yǵysyp, ornynan turǵan sátte ekinshisi – qaba saqaldy, sholaq shalbarly jigit kishkene sómkeden pyshaqqa uqsas nárseni sýyryp alyp, oń qolymen moıyn tusynan siltep qalady. Soqqynyń jedel ári dál bolǵany sondaı, beınejazbada aınalaǵa shashyraǵan, ytqyp shyqqan qan «fontany» anyq kóringen. Qaskóıdiń biri oqıǵa ornyna kelgen meıramhana qyzmetkerin qaqpaılap, kómekke jibermese, ekinshisi kásipkerge taǵy da birneshe soqqy jasaıdy.
Budan keıin kóshedegi beınebaqylaý kamerasy qara kıimdi qos jigittiń qashyp bara jatqan beınesin jazyp alǵan. Alǵashqy beınejazbadaǵy pyshaq siltegen qaba saqaldy, sholaq shalbarly jigittiń eki qoly qyp-qyzyl qan ekeni anyq kórinedi.
Árıne, polısııa qyzmetkerleri bolǵan oqıǵaǵa oraı Qylmystyq kodekstiń 99-baby boıynsha is ashylyp, sotqa deıingi tergeý amaldaryn bastap ketti. Kúdiktiniń biri saqaldy, sholaq balaqty bolǵanyna qarap, halyq arasynda kisi óltirýshilerdi destrýktıvti dinı aǵam ókilderi eken degen qaýeset jeldeı esti. Biraq Batys Qazaqstan oblystyq polısııa departamenti qylmystyń astarynda turmystyq kelispeýshilik jatqanyn, naqtyraq aıtqanda, jalaqy máselesinen týǵanyn habarlady. «Kýágerlerdiń kórsetýine qaraǵanda, kisi óltirýdiń negizgi sebebi – turmystyq sebepten, ıaǵnı tólenbegen jalaqy máselesinen týyndaǵan. Kúdiktilerdiń ýahhabızm nemese basqa da teris dinı aǵymdardyń radıkaldy ıdeıalaryn ustanǵany nemese taratqany týraly málimet joq», delingen polısııa taratqan aqparatta.
Kúdiktilerdiń kim ekeni jáne fotosýreti keshikpeı-aq málim boldy. Batysqazaqstandyq polısııa 7 tamyz kúni asa aýyr qylmys jasady degen kúdikpen 1991 jyly týǵan Rýslan Qojantaev pen 2001 jyly týǵan Turlan Amangeldige izdeý jarııalady. Olardyń sýreti oblystyń búkil aýdanyna jáne kórshiles óńirlerge, tipti Reseı Federasııasynyń shekaralas aımaqtaryna da taratyldy. Ásirese Oral qalasynyń irgesindegi saıajaılar ásker men quqyq qorǵaý qyzmetkerleriniń kúshimen qorshaýǵa alynyp, jol boıynda kólikterdi tekserý bastaldy. Jaryq kúnde, halyqtyń kóz aldynda, asqan qatigezdikpen jasalǵan qylmys jurtty shoshytyp, qoǵam narazylyǵyn týdyrdy. Oraldaǵy osynaý qylmysty jedel ashý máselesin respýblıka Ishki ister mınıstri óz baqylaýyna aldy.
«Qylmys jasalǵan sátten bastap Batys Qazaqstan oblysy polısııa departamentiniń jeke quramy túgel jumyldyrylyp, kúdiktilerdi quryqtaý úshin keń kólemde jedel izdestirý jumystary júrgizilip, qylmys ornyna jaqyn jerde ornalasqan barlyq baý-baqsha, saıajaı tekserildi. 2022 jyldyń 8 tamyzy kúni saǵat 10:30 shamasynda Oral qalasy Kóktem saıajaıynda osy qylmysty jasaǵan kúdiktiler – 1991 jyly týǵan jáne 2001 jyly týǵan eki azamat quryqtalyp, polısııa departamentine jetkizildi», dedi Batys Qazaqstan oblysy polısııa departamenti bastyǵynyń birinshi orynbasary Janbolat Janshın.
Kúdiktilerge Qylmystyq kodekstiń 99-baby 2-tarmaǵy boıynsha aıyp taǵylǵan, bul qylmysqa 20 jyldan ómir boıy bas bostandyǵynan aıyrýǵa deıin jaza qarastyrylǵan.
Oraldaǵy oqıǵa áleýmettik jelilerde erekshe talqylanyp jatyr. Keıbir jelide marqum kásipkerdi «kisi aqysyn jeıtin, jurtqa jaǵymsyz tulǵa» retinde qoǵamdyq pikir qalyptastyrý áreketi de baıqalyp qalady. Taǵy bir nusqada «meıramhanada káýap pisirýshi bolyp qyzmet etken kúdiktiniń únemi aınalasyna radıkaldy ıdeıalardy taratyp, áriptesterimen til tabysa almaǵany úshin jumystan qýylǵany» týraly áńgime aıtylady. Kópshiliktiń pikiri «teris din ókilderine memleket tarapynan qashan toqtam bolady?!» degen talap-tilekke toly. Qalaı bolǵanda da Oral qalasynda bolǵan osynaý jantúrshigerlik kisi ólimi tereń zertteýdi kútedi. Sonyń ishinde tergeý oryndary oqıǵanyń sebebi men saldaryn jasyrmaı, jalpyǵa jarııalaýy kerek-aq.
Batys Qazaqstan oblysy
