Aldaǵy dúısenbi kúni elimizde bokstan áıelder arasynda tuńǵysh ret Azııa chempıonaty jalaýyn kóteredi. 30 mamyrǵa deıin, ıaǵnı bir jetige sozylatyn baıraqty básekege sary qurlyqtyń kóptegen elderiniń qurama komandalary qatysatyn bolady.
Bul básekege Qazaqstan quramasy sapynda ótken aptada Aqmola oblysy Shýche qalasynda sońǵy oqý-jattyǵý jıyndaryn ótkizgen boksshylar myna qurammen sharshy alańǵa shyǵady. Eń jeńil 46 kg. salmaqta Nazym Qyzaıbaı, odan keıin Nazgúl Boranbaeva (48 kg.), Áıgerim Asqarova (51 kg.), Jaına Shekerbekova (54 kg.), Oksana Koroleva (57 kg.), Gúljan Ýbbınııazova (60 kg.), Saıda Qasenova (64 kg.), Elena Kolsova (69 kg.), Darıǵa Shákimova (75 kg.), Marına Volnova (81 kg.) jáne 81 kılodan joǵary salmaqta kúsh synasyp júrgen Iýldýz Mamatkýlova. Komandanyń aǵa bapkeri V.Prısıajnıýktiń aıtýynsha, quramanyń chempıonatqa daıyndyǵy óz deńgeıinde. Onyń sapynda respýblıka chempıondary, iri halyqaralyq jarystardyń jeńimpazdary men júldegerleri bar. Sonymen birge, ol qurama komandanyń dodaǵa daıyndalýyna barlyq jaǵdaıdy jasaǵan Qazaqstan boks federasııasyna alǵys sezimin bildirdi. “Bizdiń boksshylar halyqaralyq talaptarǵa sáıkes aldyn ala josparlanǵan keste boıynsha chempıonatqa jaqsy daıyndaldy. Endi bizge atalmysh básekede tek qurmet tuǵyrynyń eń bıik satysynan kóriný ǵana qaldy”, – deıdi ol. 11 mamyrda, Azııa chempıonatynyń bastalýyna eki jetideı ýaqyt qalǵanda Qazaqstan boks federasııasynyń apparat jetekshisi Janbolat Ámirjanov Azııa konfederasııasynyń resmı ókilderi, erli-zaıypty Nıeva jáne Herbert Embýldenııa (Shrı-Lanka) bastaǵan delegasııamen kezdesip, qurlyq chempıonatyna daıyndyq barysy jóninde málimettermen bóliskenin atap ótkenimiz jón. Oǵan Boks federasııasynyń osynaý básekeni ótkizýge jaýapty úılestirýshileri de qatysyp, óz pikirlerin jetkizdi. Kezdesýde erli-zaıypty resmı ókilder Qazaqstannyń atalmysh chempıonatty joǵary deńgeıde ótkize jáne aldaǵy kezde budan da basqa iri halyqaralyq jarystardy uıymdastyra alatynyna senimin bildirdi.
