Izraıl Ulttyq qoǵamdyq dıplomatııasynyń tóraǵasy Mysyrǵa taraptardy bitimgershilikke shaqyrǵany úshin alǵys bildirip, «Izraıl atysty toqtatý kelisimin buzǵan jaǵdaıda qatań jaýap berý quqyǵyn saqtaıtynyn» alǵa tartty.
Izraıl premer-mınıstri Iаır Lapıd jeksenbi kúni keshke eldiń ońtústik basshylarymen kezdesýde «Maqsattarǵa qol jetkizildi, operasııany jalǵastyrýdyń qajeti joq» dedi.
Esterińizge sala keteıik, Izraıl juma kúni «Tańsári» operasııasyn bastap, Gazanyń soltústigindegi ál-Quds brıgadasy komandırleriniń biri Taısır ál-Djabarıdi zymyrannan jasalǵan soqqy arqyly óltirdi. Operasııanyń ekinshi kúni Gazadaǵy ońtústik maıdanǵa jaýapty ál-Quds brıgadalarynyń qolbasshysy Haled Mansýrdyń kózi joıylǵanyn habarlady. Izraıl qorǵanys kúshteriniń málimetinshe, operasııanyń úsh kúninde júzden astam «Islamdyq jıhad» uıymy nysanasyna soqqy berilgen. Sonymen qatar ızraıldikter Gaza sektorynyń soltústigindegi Djabalııada bes balanyń ólimine qatysty jaýapkershilikten bosap ketkenin palestınalyq basylymdar ashyna jazdy. Izraıl «balalardyń qaıǵyly ólimi» «Islamdyq jıhad» uıymynyń zymyrandy sátsiz ushyrýynan dep málimdedi. Jerusalem Post gazetiniń málimetinshe, Izraılge 950-den astam zymyran atqylanǵan. Olardyń 200-ge jýyǵy Gaza sektorynyń aýmaǵyna qulaǵan.
Izraıldiń áýe shabýyldary 56 saǵatqa sozylyp, shabýyl saldarynan 44 adam, onyń ishinde 15 bala men 4 áıel kóz jumyp, jalpy sany 300-den astam palestınalyq jaralanǵan. Al Izraıl tarapynan zardap shekkender joq.
Izraıl óz áreketin Iran qoldaıtyn «Islamdyq jıhad» uıymynyń ulttyq qaýipsizdikke qater keltiretin shabýylyna qarsy aldyn ala jasalǵan soqqy dep aqtaldy. Sondaı-aq qaqtyǵys kezinde palestınalyq tarap Izraılge myńnan astam zymyran atqylaǵanyn, al eldiń ońtústik bóligi men Tel-Avıv sııaqty iri qalalardyń turǵyndary býnkerlerge qonǵanyn atap ótti.
«Islamdyq jıhad» uıymynyń jetekshisi Zııad ál-Nahala atysty toqtatqannan keıin «Ál-Maıadın» telearnasynan berilgen baspasóz máslıhatynda: «Bul jeńis» dep qýana habarlady.
Izraıl resmı ókilderiniń habarlaýynsha, áýe operasııasynda «Islamdyq jıhad» uıymynyń eki qolbasshysymen qosa 20-ǵa jýyq jaýynger qaza tapqan, kóptegen áskerı tank, qarý-jaraq pen zymyran óndirisi jáne saqtaý oryndary joıylǵan.
«Biz «Islamdyq jıhadty» joıǵan joqpyz jáne bul bizdiń maqsatymyz emes», dedi Izraıldiń resmı ókili. Sondaı-aq ol osy qaqtyǵys barysynda «Izraıldiń barlaý jáne áskerı operasııalyq múmkindikteriniń deńgeıine bárin tańǵaldyrdyq», dedi.
Al Gazadaǵy «Islamdyq jıhad» uıymynyń ókili bul toptyń basshylyǵy soǵys barysynda shyǵynǵa ushyraǵanymen, Izraılge sharttar qoıyp, birlik pen kelisimdi saqtaı alǵanyn aıtty. «Dushpandarymyz «Islamdyq jıhadty» toqtatýdy soǵys maqsatyna aınaldyrdy, biraq bul aldamshy maqsat júzege aspady», dedi top ókili.
Qaqtyǵystyń órship ketýin túsingen Izraıl Gazany baqylaıtyn áldeqaıda úlken jáne qaýqarly «Hamas» sodyrlarynyń soǵysqa aralasýynan qaýiptenip, «Islamdyq jıhad» uıymymen bir mámilege kelýge sheshim qabyldady.
2021 jyldyń mamyrynda Izraıl men «Hamas» toby arasynda 250 gazalyq qaza tapqan jáne aımaqtyń ekonomıkasyn kúıretken 11 kúndik soǵys boldy. Atalǵan qaqtyǵystan keıin «Hamas» óziniń odaqtasy «Islamdyq jıhadqa» belgili bir deńgeıde aýyzsha túrde qoldaý kórsetip otyrdy. Alaıda bul joly «Islamdyq jıhadty» qaqtyǵysta Izraılmen betpe-bet qaldyryp, shaıqasqa aralaspaýdy jón kórdi. Alaıda «Hamas» uıymy Izraıl operasııasy sozylyp, qurbandar sany arta berse, olar «Islamdyq jıhadqa»» qosylýǵa májbúr bolatynyn aıtqan bolatyn.
Gazadaǵy atysty toqtatý kelisiminen keıin Izraıl tańerteń Gaza sektoryna salǵan bógetterdi alyp, janarmaı tasıtyn kólikterdiń kirýine ruqsat berdi. Osylaısha eki el arasyndaǵy shekara qaqpalary qaıta ashyldy. Shekaranyń ashylýy Gazadaǵy jalǵyz elektr stansasyn qýattandyrýǵa múmkindik berdi, bul osyǵan deıin úlken másele bolǵan Gazadaǵy elektr qýatynyń qoljetimdiligin arttyrdy. Sondaı-aq eki taraptyń atysty toqtatý kelisimi kúshine engennen keıin Gaza kóshelerinde merekelik sharalar uıymdastyrylǵany habarlandy.
Oqıǵaǵa qatysty Birikken Ulttar Uıymynyń Bas hatshysy Antonıý Gýterrısh óz pikirin bildirdi. «Tek kelissózder arqyly júzege asyrylatyn turaqty saıası sheshim ǵana zorlyq-zombylyqty túpkilikti toqtatady jáne bul sheshim palestınalyqtar men ızraıldikter úshin beıbit bolashaqtyń kepili», dedi Antonıý Gýterrısh.
Ol óz sózinde Gaza men Izraıldiń atysty toqtatý týraly kelisimge kelgenine qýanyshty ekenin aıtty. Sondaı-aq Bas hatshy Gazaǵa jasalǵan áýe shabýyldary men Izraılge atylǵan zymyrandardyń saldarynan qaza tapqandar men jaralanǵandardyń arasynda balalar da bolǵanyna qaıǵyrǵanyn tilge tıek etti.
