Borodýlıha Abaı oblysyndaǵy iri agroónerkásiptik aýdandardyń biri sanalady. Munda 70 JShS, 458 sharýa qojalyǵy jumys istep keledi. Jalpy jer kólemi – 698 myń gektar, onyń ishinde aýyl sharýashylyǵyna arnalǵan jer – 474,2 myń gektar. Atap aıtsaq, egistik kólemi – 357,2 myń gektar, jaıylymdyq jer – 108,2 myń gektar jáne shabyndyqqa arnalǵan jer – 7,8 gektar.
«Kásibı baǵdarǵa sáıkes aýdannyń aýyl sharýashylyǵynda ósimdik baǵytyna basymdyq berilgen. Biraq mal sharýashylyǵy da jol qoıylǵan. Aýyl sharýashylyǵy jalpy óniminiń qurylymynda ósimdik sharýashylyǵy – 60%, mal sharýashylyǵy 40%-dy quraıdy.
Aýyl sharýashylyǵyndaǵy jalpy ónimniń kólemi – 8 mlrd 513 mln 500 myń teńgege jetti (naqty kólem ındeksi 100,3%). Bul oblystaǵy jalpy kólemniń 7,2%-yn quraıdy.
Bıylǵy egistik kólemi 327 900 gektar (2021 jylmen salystyrǵanda 8,1 myń gektarǵa kóp), onyń ishinde jazdyq daqyldar 297 600 gektarǵa egildi», dedi Borodýlıha aýdanynyń ákimi Ahmetqalı Nurǵojın.
Aýdan aýmaǵyndaǵy negizgi ónerkásip orny Jezkent kentindegi Orlovka óndiristik kásiporny sanalady. Qazir munda merdiger kompanııalar qyzmetkerlerin qosa alǵanda 3 myńnan asa adam jumys isteıdi. Bıylǵy alty aıda óndiris kólemi 28 mlrd 895 mln teńgege jetken. О́sý qarqyny – 112,4%.
Oblystyń ózge aýdandaryndaǵy sekildi Borodýlıhada da jol máselesi ózekti.
«Býrkýtovo aýylyndaǵy kireberis jol – 23 shaqyrym. Sosnovka men Býrkýtovony baılanystyratyn jol 6 jyl boıy jóndeý kórmegen. Joldyń jartysy ábden tozǵan. Júrgizýshiler aınalma jolmen júrýge májbúr. Bıyl tek shuńqyrlardy jóndeý josparlanǵan. Bul atalǵan máseleni túpkilikti sheshpeıdi. О́ıtkeni kepildik merzimi bir-aq jyl. Biz jol jóndeý jumystaryna bıýdjetten qarajat bólýdi suraımyz. Bul – smetaǵa sáıkes 860 mln teńge», dedi Tavrııa aýyldyq okrýginiń turǵyny Natalıa Starojılova.
Aýdan ákiminiń sózine súıensek, qazir aýdandyq mańyzy bar 337 shaqyrym joldyń 250 shaqyrymy qanaǵattanarlyq jaǵdaıda. Bul – 74,1%.
«Aýdandaǵy avtomobıl joldarynyń jalpy uzyndyǵy – 718 shaqyrym, onyń ishinde 96 shaqyrymy – respýblıkalyq, 285 shaqyrymy – oblystyq jáne 337 shaqyrymy – jergilikti mańyzǵa ıe joldar.
Bıyl jergilikti mańyzdaǵy joldarǵa ortasha jóndeý jumystaryn júrgizý josparlanyp otyr. Atap aıtsaq, 144 mln 586 myń teńgege (oblystyq bıýdjettiń qarajat esebinen) uzaqtyǵy 2,8 shaqyrym bolatyn Jezkent ótkizý pýnktine deıingi kireberistegi (RF shekarasy) avtomobıl jolyn ortasha jóndeý, jergilikti bıýdjetten 22 mln 950 myń teńge somasyna uzaqtyǵy 19,4 shaqyrym bolatyn Býrkotovo aýylyna deıingi kireberistegi avtomobıl jolyna aǵymdaǵy jóndeý, sondaı-aq jergilikti bıýdjetten 72 mln 200 myń teńge somasyna uzyndyǵy 3,5 shaqyrym Peremenovka-Remkı baǵytyndaǵy jolǵa ortasha jóndeý júrgiziledi.
«Aýyl – el besigi» jobasy aıasynda respýblıkalyq bıýdjetten jalpy somasy 396 mln 900 myń teńgege eldi mekenderdegi kóshelerdi jóndeý jumystary júrgizilip jatyr.
Aýdandyq aýrýhanaǵa jol jóndeý jobasy jaryq shamdaryn ornatýmen birge aıaqtaldy.
Borodýlıha, Petropavlovka, Zenkovka, Ivanovka aýyldarynda 23 shaqyrymǵa sozylǵan qıyrshyq tas jáne asfalt tóselgen kóshelerdi jóndeý jumystary iske asyrylyp jatyr», dedi A.Nurǵojın.
Oblys ákimi Nurlan Uranhaev Borodýlıhadaǵy jol problemasy óńirdegi ózge de aýdandarǵa tán másele ekenin aıtty. О́ńir basshysy atalǵan máseleni jiti baqylaýyna alatynyn jetkizdi.
«Birinshiden, tikeleı ózim baryp qaıtqan 6 aýdanda osyndaı sıpattaǵy problemalar bar ekenin túsiný kerek. Álbette, barlyq jerge qyrýar aqsha qajet. Eger de jobalyq-smetalyq qujat daıyn bolsa, bul máseleni mindetti túrde qadaǵalaımyz. Bıyl, ókinishke qaraı, jóndeý jumystarynyń júrgizilýi ekitalaı. Biraq kelesi jyly bul máselemen mindetti túrde aınalysamyz. Sondaı-aq halyq aıtyp jatqan óńirdegi basqa da joldar men kópirlerdi qarap shyǵý kerek», dedi N.Uranhaev.
Budan basqa aýdan turǵyndary gazdandyrý, jaryq jáne sýmen qamtamasyz etýge baılanysty máselelerdiń qashan retteletinin surady.
Abaı oblysy,
Borodýlıha aýdany
