4 tamyzda «Qarasora-2022» jedel profılaktıkalyq is-sharasy aıasynda Shý stansasyndaǵy temirjoldyń tuıyqtalǵan basynda 49 jastaǵy Jambyl oblysynyń turǵyny ustaldy. Tekserý barysynda odan ózindik ıisi bar jasyl tústi zat salynǵan qap tabylyp, tárkilep alyndy.
Ustalǵan azamattyń úıiniń aýlasynan da ózindik ıisi bar ósimdik tektes zat tabylyp, tárkilendi. Saraptama qorytyndysyna sáıkes, bul «keptirilgen marıhýana» bolyp shyqty, jalpy salmaǵy 45 keli 340 gr.
Ustalǵan azamat buǵan deıin osyǵan uqsas qylmys jasaǵany úshin qylmystyq jaýapkershilikke tartylǵan. Qazir ol Shý aýdandyq polısııa bóliminiń ýaqytsha ustaý ızolıatoryna qamaldy.
Vedomstvonyń málimetinshe, osy jyldyń 1 maýsymynan bastap «Qarasora» jedel-profılaktıkalyq is-sharasyn ótkizý barysynda kólik polısııasy qyzmetkerleri 60 esirtki qylmysyn anyqtady. 60 keliden astam esirtki zattary zańsyz aınalymnan tárkilendi.
