Sol aıtpaqshy sarqylmaıtyn muhıt qazaq dalasyn áli de árlendirip, áli kókirek kózin asha túsýde. Danyshpannyń budan 1,5 ǵasyr buryn aıtqan sózderi de pendelerdiń kókirek kózderin ashýda. Onyń týǵan kúninde elimizdiń soltústik qaqpasy – Qyzyljar qalasy da bir silkinip qaldy.
Aldymen Abaıdyń eskertkishine qalanyń zııaly qaýym, jergilikti bılik, bıznes jáne BAQ ókilderi gúldestesin qoıdy. Odan keıin S.Muqanov atyndaǵy oblystyq ámbebap kitaphanada «Kemeńgerliktiń bıik shyńy» atty ádebı-mýzykalyq kesh boldy. Onda M.Qozybaev atyndaǵy «Abaıtaný» ortalyǵynyń basshysy Jazıra Kókbas, Nazarbaev zııatkerlik mektebiniń qazaq tili men ádebıeti pániniń muǵalimi Aınur Qalıeva, jergilikti aqyndar Kúlaıhan Rahmet, Maral Ospanova, Dıas Aıaǵan jáne t.b. óleńderin oqydy. Kásipker Jomart Omarov Abaı óleńderi ózine aqyl berip qana qoımaı rýhanı qýat beretindigi jóninde aǵyl-tegil aıtyp berdi. Al Abaı atyndaǵy mamandandyrylǵan qazaq mektep-gımnazııasynyń oqýshylary Káribaı Erdáýlet, Jansaıa Mańkosheva, Darıǵa Serik, Ádemi Amangeldi uly aqynnyń óleńderin oqysa Anelıa Jaqsylyq «Jelsiz túnde jaryq aı» ánin tamasha oryndap berdi. Aqan seri atyndaǵy oblystyq fılarmonııanyń dombyrashysy Báıimbet Qubaıdolla Abaıdyń kóp adam bile bermeıtin kúıin tartyp berdi.
Keshti kitaphananyń qyzmetkerleri Maıra Turǵynqyzy men Qaıyrjan Málikova uıymdastyrdy. Olardyń kitaphana qorynan jınaǵan «Abaı murasy – asyl qundylyq» degen kórmesi de kelgenderdiń kózaıymyna aınaldy.
QYZYLJAR
