Is-shara aldynda qatysýshylar Abaıdyń eskertkish taqtasyna gúl shoqtaryn qoıyp, uly shaıyrdyń esimin qurmetpen eske aldy.
Qazaqstan Elshisi Serjan Ábdikárimov óz sózinde qonaqtardy aıtýly kúnmen quttyqtaı otyryp, qazaq halqynyń rýhanı baılyǵy bolyp tabylatyn Abaıdyń baǵa jetpes shyǵarmashylyq murasy bolashaq urpaq úshin máńgilik mańyzǵa ıe ekenin atap ótti. Ol ázerbaıjandyq dostarǵa Abaıdyń «Adam bol!» atty ónegelilik formýlasynyń mazmuny, onyń adamgershilikke, eńbeksúıgishtikke, aǵartýshylyqqa qatysty úndeýleri jóninde aıtyp berdi. Abaıdyń ozat shákirtteri qazaq halqynyń jerge degen quqyǵy, ózin-ózi basqarý, tili, ulttyq mádenıeti men dástúrin saqtap qalý jolynda arpalysqan «Alash» partııasy men Alash avtonomııasyn qurǵany aıtyldy.
Dıplomat abaıtanýshylarǵa olardyń Abaı shyǵarmalaryn ázerbaıjan tiline aýdarýdaǵy jyldar boıǵy eńbegi, Abaıdyń búkil túrki álemi men dúnıe júzi ádebıeti úshin qundy bolyp sanalatyn murasyna degen qurmetteri men súıispenshilikteri úshin alǵys bildirdi.
Sóz alǵan qonaqtar Abaı qazaqtyń óz halqyna baq-berekege jeteleıtin týra jol kórsetken birtýar perzenti, ǵalymy, maqtanyshy ekenin, ári onyń eńbekteri búkil adamzatqa, onyń ishinde, baýyrlas ázerbaıjan halqyna da tıesili ekenin atap ótti.
Aksııa geosaıasat, din, ádebıet jáne óner máselelerin zertteıtin belgili ázerbaıjandyq tarıhshy, pýblısıst, teolog Teımýr Ataevtyń «Abaıdyń ulylyǵy nemese 21 ǵasyrdaǵy oıshyldyń portretin jasaýǵa talpynys» atty kitabynyń tusaýkeserimen jalǵasty. Bul basylymda Abaıdyń ataqty shyǵarmasy – «Qara sózderi» taldanady. Avtor bul eńbekti túrli qyrynan zerttegen, onyń ishinde Abaı oılaryn qasıetti Qurandaǵy ýahılermen salystyrýǵa tyrysqan. Bul rette avtor qazaq tarıhynyń aqyn tulǵasyn qalyptastyrýǵa áser etken dańqty betteri men Abaıdyń basynan ótken san-alýan jaǵdaılar kórnekti aǵartýshynyń qazaq oı-paıymyna ólsheýsiz úles qosýyna múmkindik bergenin túsinýge umtylady.
Kitaptyń tusaýkeseri Qazaqstan men Ázerbaıjan arasyndaǵy dıplomatııalyq qatynastardyń ornaǵanyna 30 jyl tolýyn merekeleý aıasynda Bakýdegi Teńiz jaǵalaýy býlvarynda tigilgen qazaqtyń kıiz úıinde ótti.
