Bul týraly Saýd Arabııasynyń Qajylyq jáne ýmra mınıstrligi arnaıy jazbasha málimdeme jasady. Málimdemede bul sheshimniń «Saýd Arabııasynyń 2030 jylǵa deıingi maqsattaryna sáıkes, bıylǵy kishi qajylyq maýsymynyń bastalýymen ýmra ǵıbadattaryn oryndaýǵa kelgenderdiń rásimderin jeńildetý aıasynda qabyldanǵanyn» alǵa tartty.
Sondaı-aq málimdemede bul sheshimniń barlyq qyzmetterdi joǵary sapada kórsetý jáne ýmraǵa kelýshilerdiń mádenı, dinı tájirıbesin baıytýǵa baǵyttalǵan árekettiń bir bóligi ekeni aıtyldy.
Saýd Arabııasynyń kez kelgen áýejaıynan vıza ala alatyn elderdiń azamattary, sondaı-aq tólqujattarynda Saýd Arabııasyna kirý móri bar AQSh, Ulybrıtanııa jáne Shengen vızalarynyń ıeleri bir ret ýmra ǵıbadattaryn esh qıyndyqsyz oryndaı alatyny aıtyldy. Esterińizge sala keteıik, buǵan deıin kóptegen elder ýmra úshin arnaıy vıza alý kerek edi.
Sonymen qatar málimdemede Otbasylyq vıza jáne jeke vıza alǵan azamattar Saýd Arabııasyndaǵy týystary men dostaryna barǵan kezde «Ýmra» qosymshasy arqyly tirkelip jáne biryńǵaı ulttyq vıza platformasyna ótinish berip ýmra jasaı alatyny týraly aqparat bar.
Al Qazaqstan azamattaryna bul jeńildik eki eldiń ózara kelisimi negizinde 2019 jyly engizilgen. 2019 jyldan bastap Qazaqstan azamattarynan kishi qajylyq úshin Saýd Arabııasyna arnaıy vıza talap etilmeıdi. Onyń ornyna qazaqstandyqtar Saýd Arabııasyna týrıstik elektrondy vıza alýǵa ótinish berý arqyly, kishi qajylyq paryzyn óteı alady.
Ýmra saparyna týrıstik elektrondy vıza alý úshin Qazaqstan azamattaryna qajet bolatyn jalǵyz qujat – sheteldik tólqujat. Sizdiń sheteldik tólqujatyńyzda Izraıl nemese Iran vızasynyń bolýy da Saýd Arabııasyna vıza alýǵa kedergi bolmaıdy. Ýmra jasaýǵa vıza alý úshin jalǵyz shart – sheteldik tólqujattyń jaramdylyq merziminiń Saýd Arabııasyna kirý kúninen bastap keminde 6 aı bolýy kerek.
Qazaqstandyqtar úshin Saýd Arabııasynyń týrıstik elektrondy vızasy óte yńǵaıly vıza. Mundaı vızamen Qazaqstan azamattary Saýd Arabııasyna Ýmra ǵıbadaty úshin nemese birshama ýaqytqa arnaıy týrıstik demalysqa bara alady. Degenmen keıbir elderde ýmra 10 kúnge sozylýyna sáıkes elektrondy vızalar birneshe kúndik merzimge ǵana beriledi. Al ýmra úshin Saýd Arabııasyna týrıstik elektrondy vıza alǵan qazaqstandyqtarǵa bul vıza boıynsha Saýd Arabııasynda 90 kún qalýǵa ruqsat etilgen.
