Lıon qalasynyń turǵyndaryna ázirge kógaldy sýarýǵa, sondaı-aq mashına jýýǵa bolmaıdy. Ýaqytsha erejeni buzǵan adamǵa aıyppul salynýy múmkin. Ońtústiktegi Lazýrnyı jaǵalaýynda júzge jýyq kommýna sý tapshylyǵyna ushyrady. Jergilikti jaǵajaılardaǵy dýsh baǵanalarynda sý múlde toqtatyldy.
Qurǵaqshylyq kórsetkishteriniń biri – sý qoımalarynyń tartylýy. Savoıdaǵy Ansı kólinde jaz bastalǵaly beri sý deńgeıi 33 sm-ge tómendep ketken. Ázirge bul jaǵdaı flora men faýnaǵa áser etpegen. Biraq adamdar qazirdiń ózinde atap aıtqanda, sý kóligine baılanysty biraz qıyndyqqa tap bolyp jatyr.
Sý tapshylyǵy Eýropanyń kóptegen aımaqtary úshin kúrdeli máselege aınalyp otyr. Majarstanda meteorologtar 1901 jyldan beri, ıaǵnı bir ǵasyrdan astam ýaqytta bolmaǵan eń qurǵaq jeti aıdy tirkedi. Sý resýrstary bas basqarmasynyń málim etýinshe, bıyl jaýyn-shashynnyń ortasha mólsheriniń jartysy ǵana jaýǵan.
Ulybrıtanııada da bolyp jatqan aptap ystyq aýyl sharýashylyǵyna qıyndyq týǵyzdy. Fermerler malǵa kók shóptiń qalmaǵanyn jáne egindi sýarý úshin sý jetkiliksiz ekenine shaǵymdanyp otyr.
Bılik sý tutynýdy shektep jatsa, ekologtar batpaqtardy qalpyna keltirýdi usynyp otyr. Mamandardyń aıtýynsha, bul shara qurǵaqshylyqpen uzaq merzimdi kúresý úshin jetkilikti ylǵal jınaýǵa múmkindik beredi.
