Sybaılas jemqorlyqqa qarsy is-qımyl agenttiginiń baspasóz qyzmetiniń habarlaýynsha, quzyrly organ ókilderi QTJ qyzmetindegi sybaılas jemqorlyq táýekelderine syrtqy taldaýdy bastap ketken. Taldaýdy agenttiktiń, Ulttyq kompanııanyń, múddeli memlekettik organdardyń mamandary jáne azamattyq qoǵam ókilderi júrgizbek. Taldaý barysynda temir jol salasynda sybaılas jemqorlyq quqyq buzýshylyqtardyń jasalý sebepteri men jaǵdaılary zerdelenetin bolady. Bul ulttyq operator qyzmetiniń tıimdiligine, buryn memlekettik bıýdjetten jáne Ulttyq qordan alynǵan qarajattyń jumsalýyna áser etedi dep kútilýde.
Aıtyp aýyz jıǵansha bolǵan joq, jaqynda «Jolaýshylar tasymaly» basshylary «Tulpar-Talgo» poıyzdarynyń basshylarynan syıaqy alyp otyrǵany áshkerelendi. Atap aıtsaq, Qarjylyq monıtorıng agenttiginiń elordalyq departamenti «Ekspress» fılıalynyń «Jolaýshylar tasymaly» aksıonerlik qoǵamynyń Nur-Sultan qalasy boıynsha ýchaskesiniń basshysy men onyń orynbasarynyń «Tulpar-Talgo» poıyzdarynyń basshylarynan júıeli túrde aqshalaı syıaqy alý faktilerin anyqtady.
Belgili bolǵandaı, «Ekspress» fılıalynyń «Jolaýshylar tasymaly» aksıonerlik qoǵamynyń elordalyq ýchaskesiniń basshysy men onyń orynbasary tekserý júrgizbegeni úshin ár reısten zańsyz aqsha talap etip, alyp otyrǵan. Bul is boıynsha barlyǵy 27 epızod anyqtalyp otyr. Kináliler kommersııalyq uıymdarda basshylyq qyzmet atqarý quqyǵynan aıyrylyp, 6 mıllıon teńgege jýyq aıyppul tóleýge tıis. «Qazirgi ýaqytta atalǵan uıymǵa qylmystyq quqyq buzýshylyq jasaýǵa yqpal etken mán-jaılardy joıý týraly usynys engizildi», delingen Qarjylyq monıtorıng agenttiginiń baspasóz qyzmeti usynǵan habarlamada.
