Elimizdiń túkpir-túkpirinen 40 qurylysshy shaqyrylyp, olardyń ishinde 5 qurylysshyǵa – «Qazaqstannyń qurmetti qurylysshysy», 30 qurylysshyǵa – «Qazaqstannyń eńbek sińirgen qurylysshysy» ataǵy men tósbelgisi tapsyryldy, sondaı-aq atalǵan saladaǵy 7 maman Qazaqstan qurylysshylar odaǵynyń alǵys hattarymen jáne kásibı atalymdarymen marapattaldy. «Eńbek sińirgen qurylysshy» qurmetine 30 maman, al qalǵan nomınasııalarǵa qarapaıym jumysshylar ıe boldy. Sonymen qatar eleýli eńbektiń nasıhattalýy úshin «Qurmetti prorab», «Qurmetti kran mashınısi», «Qurmetti sheber» nomınasııalary boıynsha da tósbelgiler óz ıelerin tapty. Qazaqstan qurylysshylar odaǵy elimizdiń basqa óńirlerindegi qurylysshylardy da nazardan tys qaldyrmady. Respýblıka boıynsha 40 nagrada men alǵys hat atalǵan is-sharaǵa kele almaǵan óńirlerdegi qurylysshylarǵa joldandy.
«Qurmetti qurylysshy» atanǵan Mıram Baıdıldın, Seıfýlla Jańabaev, Serikbaı Omarqas, Temiraly О́temurat jáne Sergeı Trapeznıkov el ekonomıkasynyń kúretamyry qurylys bolǵandyqtan, áriptesteriniń eńbegi qandaı baǵaǵa da laıyqty ekenin atap ótti.
Búgingi tańda bul odaqqa osy saladaǵy 1 200-den astam kásiporyn senim artyp, olardyń 250 myńnan astam múshesin qamtyp otyr. Odaqtyń basty maqsaty – bıznesti damytý. О́ıtkeni qurylys el ekonomıkasynyń damýyna áser etetin jetekshi salalardyń biri bolyp sanalady.
Saltanatty jıynda elimizdiń betkeustar qoǵam qaıratkerleri, sport sheberleri, buqaralyq aqparat quraldary ókilderi qatysty. Keshtiń kórkin ulttyq naqyshtaǵy saz aspaptar ansambli men basqa da sahna sheberleri kirgize tústi.
Qurylysshylar odaǵynyń tóralqa tóraǵasy Talǵat Erǵalıev aldaǵy ýaqytta jas jetkinshekterdi Qazaqstan boıynsha atalǵan eńbek túrine baýlýǵa tyń joba daıyndap jatqanyn jetkizdi. Keleshek jastardyń qolynda ekendigin eskersek, elimizdiń sáýlet ónerinen kútetin úmit zor. Qurylysshy mamandyǵy – qyraǵylyq pen sheberlik, talant pen talǵamdy talap etetin eleýli mamandyqtardyń biri de biregeıi. Qurylysshynyń qoltańbasy qalǵan ǵımarattar – sol qoǵamnyń ómirinen syr shertetin erekshe derekkózi desek artyq emes.
– Aldymyzda úlken mindetter tur. Aldaǵy jeti jylda taǵy 10 mıllıondaǵan páter tapsyrý qajet. Sondyqtan eńbek aýqymy óte úlken. Bul jas urpaqty atalǵan salaǵa tárbıelep, qurylysqa qajetti jas mamandardy oqytýdy, mamandyqtyń tanymaldylyǵyn, eńbekke degen qurmetti arttyrýdy qajet etedi. Sebebi aptapta da, aıazda da qurylys esh toqtamaýy tıis. Bizdiń uıym qazir osy máselemen shuǵyldanýda, – dedi T.Erǵalıev.
«Atameken» UKP Tóralqasynyń Turǵyn úı-kommýnaldyq sharýashylyǵy jáne qurylys komıtetiniń tóraǵasynyń mindetin atqarýshy Irına Manjanova jarty ǵasyrdan astam ýaqyt atap ótilip kele jatqan qurylysshylar kúni eńbek áýletteriniń mereıin ósiretinin, qazirgi pandemııa, ekonomıkalyq daǵdarystarǵa qaramastan otandyq qurylysshylar atalǵan salany alǵa jetelep kele jatqanyn atap ótti.
