Qylqalam sheberiniń shyǵarmalarynyń kópshiligi ádebı nemese tarıhı taqyryptardy qozǵaıdy. Ańyzdar men ertegiler sýretshini erekshe tań qaldyrdy. Kompozısııaǵa qatysýshylardyń bári sońǵy mınýtqa deıin dúrbeleń ishinde júredi. Oqtaýly myltyqtar, ótkir pyshaqtar janalǵysh qural ǵana emes, qorǵanysh jáne ajalǵa arasha. Shyǵarmanyń emosıonaldy qarqyndylyǵy avtordyń barlyq týyndysyna tán qubylys. Muny ónertanýshylar da aıtady.
Kartınaǵa kóz salsańyz, eki ańshy taý ózeniniń janynda aǵashqa súıengen jartasty qalqan etken. Olardyń ashyq qyzyl jáne aq tústi kıimi aǵash kóleńkesinen ańǵa kórinbeıdi. Keıipkerlerdiń qol-aıaqtary ań patshasynyń áreketin qaıtalap turǵandaı. Aldaǵy bolar oqıǵany ishteı túısingen ańshylar úlken pyshaqty keıinge qaldyrǵan. Bul detal túbi olardyń arystannan aılasyn asyryp, oljaǵa keneletinin ańǵartady.
Baqsańyz, jarqyraǵan kógildir aspan men taý aǵyny aǵash pen jartastardyń tereń kóleńkesin kesip ótip, jaryqtyń tepe-teńdigin buzady. Bul – beıbit taý peızajy jalpy sıýjettiń dınamızmin kúsheıtedi. Ábden shynyqqan qos ańshy kúni boıy arystandy ańdyǵanyn baıqaımyz. Ekeýi de urysqa saqadaı saı. Al ań bolsa, túbi tuzaqqa túserin baǵamdaıtyn sekildi.
Ejen Delakrýa kartınamen jumys isteı otyryp, 1855 jyly Parıjde ótken dúnıejúzilik kórmede usynylǵan «Arystan aýlaý» taqyrybyn qaıta tańdap alady. Sonymen romantızmniń negizin salýshy ekzotıkalyq elderge saıahattap, akademııalyq eski álem mádenıetiniń jańa jarqyn stıli men erekshe sıýjetterin ómirge ákeldi.
