Jeńdik súzgiler gazdy tazartý úshin qoldanylady. Metall balqytý kezinde gaz túziletini belgili. Gazdar gaz tazartý júıesine tartylyp, súzgilerden ótedi. Sonyń saldarynan súzgilerdiń betinde usaq shańdar qalady. Qondyrǵy 99 paıyz barynsha tıimdi jumys isteýi úshin súzgilerdi turaqty túrde almastyrý mańyzdy. Onymen kásiporynnyń arnaıy qyzmeti aınalysady.
Aqsý ferroqorytpa zaýytynda bıyl úsh balqytý sehynyń jeńdik súzgileri aýystyryldy.
– Búkil álemde qoldanylyp júrgen serıtıfıkaty bar, tekseristen ótken súzgilerdi ǵana paıdalanamyz. Ár gaz tazalaǵyshtyń óz súzgisi bolady. Súzgilerdiń barlyǵy ınnovasııalyq materıaldardan jasalǵan. Olar súzgilerdiń beriktigin qamtamasyz etip, ony paıdalaný merziminiń sońyna deıin saqtaıdy. Paıdalaný sharttaryna baılanysty eki jyldan tórt jylǵa deıin qoldanýǵa bolady. Súzgilerdiń tozǵanyn kútip otyrmaımyz, olardy erterek aýystyra beremiz, – deıdi zaýyttyń bas ekologi Inna Davydova.
Onyń aıtýynsha, kún sýytqansha taǵy úsh gaz tazartý keshenine jańa súzgiler qoıylady.
Budan bólek kásiporynda №4 balqytý peshiniń gaz tazartý qurylǵysy jetildirilip jatyr. Byltyr munda №42 pesh úshin jańa gaz tazalaý kesheni salyna bastady.
– Ekologııa jáne tabıǵı resýrstarǵa uqypty qaraý ERG úshin qashan da mańyzdy. Topta 2018 jyldan beri Ekologııalyq strategııa kezeń-kezeńimen júzege asyrylyp keledi. Strategııa aıasynda úzdik ınnovasııalyq sheshimder engiziledi. Qazir kásipornymyzdyń barlyq peshi gaz tazartqysh qondyrǵylarmen jabdyqtalǵan. Ondaǵy súzgilerdi ýaqtyly jańalap kelemiz. Munymen shektelmeı, tazalaý deńgeıi joǵarylaý ári paıdalaný sıpattamasy jaqsartylǵan zamanaýı keshen salamyz, – deıdi Aqsý ferroqorytpa zaýytynyń dırektory Valentın Chıhıchın.
Búginde №42 pesh gaztazartqyshynyń qurylys alańynda iri gabarıtti metall konstrýksııalary montajdalyp, korpýsy turǵyzylyp jatyr. Keshen burynǵy jyldardyń tájirıbesine súıene otyryp Siemens (Germanııa) jáne ZVVZ (Chehııa) óndirisiniń jabdyqtarymen jaraqtandyrylady. Olar ınnovasııalyq tazartqysh tehnologııalar men sheshimder salasynda álem boıynsha kósh bastap tur. Jańa gaztazartqyshty Aqsý metallýrgteri kelesi jyldyń sońynda iske qosýdy josparlap otyr.
