Jarqyn joba el fýtbolynyń otany sanalatyn Semeı qalasynan bastaý alyp, Pavlodar, Aqtóbe, Aqtaý, Taraz, Shymkent, Nur-Sultan, Almaty qalalarynda jalǵasty. Joba jetekshileri úsh aıǵa jýyq ýaqyt ishinde úmitkerlerdiń aıaq alysyn baıqap, úzdikterdiń esimin kúndeligine túrtip otyrdy. Shyn myqtylar aýyldan shyǵady deımiz ǵoı. Deı turǵanmen joba bıyl alǵash ret qolǵa alynǵandyqtan ázirge shalǵaı eldi mekenderdi qamtý aldaǵy ýaqyttyń enshisine qaldyrylypty. Sonyń ózinde oblys ortalyǵynda ótken irikteýlerge 400 shaqyrym joldy artqa tastap, aýyldyq jerlerden arnaıy at basyn burǵandar kóp bolypty. Máselen, Baıanaýyl aýdany Maıqaıyń kentinen kelgen órender alystan bekerge kelmegenin dáleldep, úzdikterdiń qatarynan tabyldy.
Irikteýden irkilmeı ótkender sońǵy bir aı boıy Talǵardaǵy ulttyq quramanyń bazasynda sheberlikterin shyńdady. Ár apta saıyn azýly komandalarmen joldastyq kezdesýler ótkizip turdy. Tipti óz «zamanynda» Qazaqstan ulttyq quramasynyń namysyn qorǵaǵan tanymal ardager fýtbolshylarmen sheberlik baıqasyp, mol tájirıbe jınaqtaǵan edi. Atap aıtsaq, Samat Smaqov, Davıd Lorııa, Nurbol Jumasqalıev, Andreı Karpovıch, aǵaıyndy Azovskııler, Farhadbek Irısmetov, Dmıtrıı Bıakov, Aleksandr Kýchma, Maksım Jalmaǵambetov, Qaırat Áshirbekov, Danııar Muqanov, Sergeı Boıchenko, Iýrıı Novıkov, Igor Soloshenko, Rýslan Baltıev, Edýard Sergıenko sekildi fýtbolshylarmen dop tebý baqyty buıyrdy. Sondaı-aq joldastyq kezdesýge kezinde Ispanııanyń «Real Madrıd», Italııanyń «Inter» klýbynda jasyndaı jarqyldaǵan Esteban Kambıasso arnaıy shaqyrylǵan bolatyn.
«Super Bol» jobasynyń «Astana Arena» stadıonynda ótken sheshýshi sáti tartysqa toly boldy. Joba qatysýshylary qorytyndy kezdesýdi elimizdiń birinshi lıgasynda baq synaıtyn «Jeńis» komandasyna qarsy ótkizdi. Sheshýshi dep oıyp turyp kórsetkenimiz tegin emes. Sebebi bul matchqa shetelden, alys-jaqynnan 60-tan astam skaýt kelip, sheberligimen kózge túsken oıynshylardy óz komandasynyń qataryna qosýǵa nıet tanytty. Olardyń arasynda azýly degen ıtalııalyq «Torıno» men máskeýlik «Spartaktyń» mamandary, «Chelsı» komandasynyń tehnıkalyq dırektory Klod Makelele boldy. Qysqasy, bul kezdesýde «Super Bol» jobasy qatysýshylarynyń taǵdyry sheshildi.
Kezdesýge toqtalsaq, qos komandanyń oıynshylary da barynsha myqtylyǵyn kórsetýge tyrysty. «Jeńis» komandasy tómengi lıgadan endi ǵana kóterilip, «abyroı jınap» júrgendikten jankúıerlerdiń ystyq yqylasyna bólenýge baryn saldy. Kezdesýdiń alǵashqy jarty saǵaty sýperboldyqtardyń shabýylymen este qaldy. Ásirese komanda kapıtany Aıanhan Dýnaıbektiń belsendi umtylysyn atap ótken jón. «Jeńis» komandasynyń aıaqdopshylary da qarap qalǵan joq. Taktıkalyq shabýyldaryn uıymdastyryp, qarsylastyń aptyǵyn basýǵa tyrysyp baqty. Dese de Aıanhannyń shıraq qımyly óz nátıjesin berdi. Qaqpashymen betpe-bet qalǵan sátte qorǵaýshylardyń biri Aıanhandy sulatyp túsirip, kezdesýdiń bas tóreshisi Ravshan Irmatov penaltı belgiledi. Iá, qalys estigen joqsyz. Bul kezdesýge 2015 jyly álemniń eń úzdik tóreshisi atanǵan ózbek mamany qazylyq etti. Penaltıdi Álibek Járdemov sátti oryndap, komandasyn alǵa shyǵardy.
Ekinshi taımda da alma-kezek shabýyl tolastaǵan joq. Dese de tablodaǵy esep kezdesýdiń aıaǵyna qaraı jıi ózgerdi. Kezdesýdiń 81 jáne 84-mınýttarynda «Jeńis» komandasynyń oıynshysy Saıan Muqanov dýbldiń avtory atandy. Al kezdesýdiń 90 mınýtynda Aıanhan aqyry degenine jetip, esepti teńestirdi. Kezdesýden keıingi penaltı serııasynda 6-5 esebimen «Super Bol» komandasy jeńiske jetip, jobanyń núktesin tamasha qoıdy.
Kezdesýden keıin kópshiliktiń asyǵa kútkeni transferdiń barysy edi. Árıne, kezdesý aıaqtala sala bárine birdeı kelisimshart usynyla bermes. Mamandar jaqsylap oılanyp, áriptesterimen aqyldasyp, bir toqtamǵa keletini túsinikti. Deı turǵanmen, alǵashqy transfer kóp kúttirgen joq. Baıanaýyldyq jas talant Jaqsylyq Kenjebaevqa «Aqsý» (Pavlodar) komandasy «quda tústi». Jaqsylyq bul jobaǵa qatysý úshin zaýyttaǵy jumysyn tastaýǵa bel býǵan. Bala kúngi armanyna qol jetkizý úshin osyndaı qadamdarǵa barǵan ol maqsatyna jetti de. Kezdesýden keıin kózine erik bergen ol: «ata-anamnyń úmitin aqtadym» dep qýanyshtyń jasyn súrtti.
Odan keıin Álibek Járdemovke «Aqtóbe» komandasy usynys jasaǵany habarlandy. Al Aıanhan Dýnaıbekke «Maqtaaral» komandasy qyzyǵýshylyq tanytqan kórinedi. «Jeńis» komandasynyń bas bapkeri Rınat Alıýetov te kezdesýge deıin «Super Bol» jobasy qatysýshylarynyń ishinen 2 oıynshyǵa kóz túskenin aıtqan bolatyn. Bastysy, jobanyń maqsaty oryndalyp keledi. Jaqyn kúnderi joba qatysýshylaryna jan-jaqtan usynystar túsip, súıinshi habarlar kóp bolady degen senim mol.
Esterińizge salsaq, «Super Bol» jas fýtbolshylar jobasyn Prezıdent janyndaǵy «Dara» daryndylardy qoldaý qory jáne Freedom Broker ınvestısııalyq kompanııasy qolǵa aldy. Jobanyń hedlaınerleri – Davıd Lorııa men Samat Smaqov.
– Naǵyz myqtylar aýyldan shyǵady. Biraq kóbi sol jaqta qalyp qoıady. Bizdiń jobanyń maqsaty – solardy anyqtap, baptap, úlken oıyndarǵa qosý. Árıne, qalalyq jerlerdegi jastar da nazarda, – dedi «Super bol» jobasynyń bas menedjeri Davıd Lorııa.
Árıne, joba alǵash ret uıymdastyrylǵandyqtan azdy-kem olqylyqtardyń oryn alýy zańdylyq. «Super bol» jobasynyń kreatıvtik prodıýseri Aıdyn Qojahmet aldaǵy ýaqytta áli talaı órenge úlken múmkindikter beriletinin jetkizdi. Kópshiliktiń kútkeni de sol. Endeshe, iske sát!
