Bıyl qańtar-maýsymda Qazaqstannyń eksporty 56,3 paıyzǵa ósip, 42,2 mlrd dollardy quraǵan. «QazTrade» AQ málimeti boıynsha, shıki munaı satý – 84,7 paıyzǵa, ýran – 2 esege, ferroqorytpa – 57 paıyzǵa, sýblımasııalanǵan, tundyrylǵan nemese kolloıdty kúkirtten basqa kúkirt – 3,2 esege, bıdaı – 54,1 paıyzǵa, mys jáne katodty mys – 16,5 paıyzǵa jáne tas kómir tasymaly 2,1 esege artýyna baılanysty jalpy eksporttyq ósimge qol jetken.
О́z kezeginde ımport 14,6 paıyzǵa ósip, alty aı ishinde elimiz 21,4 mlrd dollardyń ónimin syrttan satyp alǵan. Negizinen ımporttalǵan taýarlar – avtomobılderge arnalǵan shanaqtar (2,5 ese), bólshek saýda úshin ólshenip salynǵan dárilik zattar (36,9 paıyzǵa), qara metaldardan jasalǵan ózge de buıymdar (2,2 ese), mys kenderi men konsentrattary (5,3 ese), avtomobılder jáne traktorlarǵa arnalǵan bólshekter men kerek-jaraqtar (41,3 paıyzǵa) jáne telefon apparattary (22,7 paıyzǵa).
Infografıkany jasaǵan Amangeldi Qııas, «EQ»
Sonymen qatar shıkizattyq emes taýarlar da syrt elderge birshama táýir saýdalanǵan. Onyń alty aıdaǵy aınalymy – 31,6 mlrd dollar jáne byltyrǵy uqsas kezeńnen 20,6 paıyz nemese 26,2 mlrd dollarǵa kóp. Alǵashqy jarty jyldyqta shıkizatqa jatpaıtyn taýarlardyń eksporty 33,5 paıyzǵa ósip, 12 mlrd dollarǵa jetken. Al syrttan quny 19,6 mlrd dollar bolatyn shıkizattyq emes taýarlardy satyp alyppyz. Árıne, bul turǵyda áli de bolsa teris saldoda ekenimizdi baıqaý qıyn emes.
Jalpy, saýda eksporty boıynsha negizgi saýda seriktes elderdiń bestigine – Reseı, Qytaı, Italııa, Túrkııa jáne Ońtústik Koreıa kiredi.
