Qazaqstan qurama komandasy músheleri arasynan Iýsýf Masıevtiń ónerine tánti boldyq. 97 kılo salmaq dárejesinde aıqasqan jerlesimiz bastapqy básekede ýkraınalyq Vladıslav Draganchýkti (9:0) aıqyn basymdyqpen utsa, ile-shala shvesııalyq Maans Erık Heıns Klostermandy (7:3) qapy qaldyrdy. Shırek fınalda serbııalyq Lýka Katıchti qos jaýyrynymen jerge qadaǵan ol jartylaı fınalda qyrǵyzstandyq Nýrmanbet Raımalyýýlýnyń (11:2) tas-talqanyn shyǵardy. Fınalda Iýsýftyń joly Irannyń myqtysy Alı Ramananálı Abedıdarzımen qıysty. Bul tartys 9:4 esebimen Parsy eli ókiliniń paıdasynan sheshilip, bizdiń Iýsýf kúmis medal ıelendi.
67 kılo salmaqtaǵy Dinmuhamed Qoshqar úndistandyq Ankıt Gýlııany (8:4), moldovalyq Kasper Nıklaı Oeverıbıdi (8:0) jáne amerıkalyq Robert Paýl Peresti (3:3) utqanymen, jartylaı fınalda ázerbaıjandyq Kannan Abdýlazadege (2:9) jol berdi. Desek te qola medal úshin básekede Dinmuhamed túrkııalyq Onýr Iýrtadanyń (3:2) osal tusyn tapty. Qoshqardyń jeńip alǵan qola júldesi de qazaqtyń taqııasyna tar kelmesi anyq.
Jubanysh básekelerinde Baqytjan Qabdyl men Mereı Máýlethanov kúsh synasty. 60 kılo salmaqtaǵy Baqytjan aremenııalyq Sýren Agadjıanǵa jáne 72 kılo salmaqtaǵy Mereı moldovalyq Aleksandrý Sloveıge jeńilgenimen, qarsylastary fınalǵa shyqqannyń arqasynda olar júldeli oryndar úshin talasý múmkindigin saqtap qaldy. Biraq Qabdyl birden utylsa, Máýlethanov eki birdeı qarsylasyn qapy qaldyryp, úshinshi oryn úshin belesýde Amır Alı Abdıge (0:4) ese jiberdi. Sóıtip, Qazaqstannyń grek-rım kúresi shebereleri Sofııadaǵy saıysty qos júldemen qorytyndylady.
Komandalyq esepte Iran quramasy ozdy. Parsy eliniń pehlevandary 4 altyn, 2 kúmis jáne 2 qolany oljalady. Ekinshi orynda – Ázerbaıjan. Qap taýynyń qyrandary 3 altyn men 2 qolaǵa qol jetkizdi. Úshinshi satyǵa Armenııanyń arlandary taban tiredi. Olar 1 altyn men 1 kúmisti enshiledi. Úzdik bestikti Ýkraına
(1 altyn men 1 qola) men Germanııa (1 altyn) túıindedi.
Grek-rım kúresinen álem chempıony atanǵan balýandar: 55 kılo – Nıhad Gýlýzade (Ázerbaıjan), 60 kılo – Saıd Morad Esmaılı (Iran) , 63 kılo – Iman Hosseın Mohammadı (Iran), 67 kılo – Kannan Abdýlazade (Ázerbaıjan), 72 kılo – Gýrban Gýrbanov (Ázerbaıjan), 77 kılo – Denı Nakaev (Germanııa), 82 kılo – Alıreza Azızhoh Mohamadıpıanı (Iran), 87 kılo – Vıgen Nazarıan (Armenııa), 97 kılo – Alı Ramananalı Abedıdarzı (Iran) jáne 120 kılo – Mıhaılo Vyshneveskıı (Ýkraına).
Esterińizge sala keteıik, buǵan deıin Qazaqstannyń balýandary arasynan erkin kúresten Mereı Bazarbaev (57 kılo), áıelder kúresinen Altyn Shaǵaeva men Anastasııa Panasovıch kúmis medal oljalasa, Mádına Aman (59 kılo) qolaǵa qol sozǵan edi. Nátıjesinde, Bolgarııanyń boz kileminde jerlesterimiz jeti júldege qol jetkizdi. Tarqatyp aıtsaq, bizdiń balýandar 4 kúmis pen 3 qola medal ıelendi.
