Oblystaǵy oqýshy sany 330 myńnyń ústinde eken. Al 35 myń bala bıyl tuńǵysh ret mektep tabaldyryǵyn attamaq. Derekke júginsek, oblystaǵy barlyq mektep 100 paıyz kompıýterlik tehnıkamen jabdyqtalǵan jáne ınternet jelisine qosylǵan. Sondaı-aq «Kúndelik» avtomattandyrylǵan aqparattyq júıesiniń qyzmetin 396 bilim berý uıymy qoldanady. Al sıfrlyq bilim berý resýrstaryna aımaqtaǵy 385 mektep qosylýǵa múmkindik alsa, onyń túgelge derligi BilimLand júıesimen jáne bir mektep Daryn.online.kz júıesimen jumys isteıdi.
– Bıyl aımaqta 35 myń oqýyshy mektep tabaldyryǵyn birinshi ret attaǵaly otyr. Qazir oqýshylardy mektepke daıyndaý jumysy qarqyn alǵan. Ol jaqyn kúnderi tolyq aıaqtalady. Onyń ishinde az qamtylǵan otbasydan shyqqan
27 765 balany tegin mektep formasymen jáne keńse zattarymen qamtamasyz etý josparlanýda. Bir balaǵa mektep formasy men keńse taýarlaryn 37 500 teńgege alýǵa bolady. Sondaı-aq «Mektepke jol» aksııasy aıasynda balalarǵa 736 mln teńge kóleminde kómek kórsetildi. Oqýlyqtar satyp alý jáne kitap qoryn jańartý úshin 2,7 mlrd teńge qarajat bólindi, – deıdi oblystyq bilim basqarmasy basshysynyń orynbasary Gúlsara Isaǵulova.
Almaty oblysy elimizdegi úsh aýysymda oqıtyn mektep sany jóninen aldyńǵy orynda. Qazir aımaqtaǵy 54 bilim oshaǵyna bala syımaǵandyqtan, oqýshylar úsh aýysymǵa bólinip oqýǵa májbúr. Jalpy, óńirde 54 úsh aýysymdy mektep bar, Mektep jetispeýshiligi, ásirese Almaty qalasy mańyndaǵy aýdandarda qatty sezilip otyr. Mysalǵa, Ile aýdanynda – 20, Qarasaı aýdanynda – 12, Jambyl aýdanynda – 10, Talǵar aýdanynda – 6, Eńbekshiqazaq aýdanynda – 5 jáne Uıǵyr aýdanynda 1 mektepte oryn jetispeýshiligi bar. Jalpy, aımaq boıynsha 23,3 myń oqýshyǵa oryn sany jetkiliksiz. Sondaı-aq óńirge 467 pedagog maman qajet. Onyń ishinde Talǵar aýdanynda – 133, Ile aýdanynda – 89, Eńbekshiqazaq aýdanynda – 67, Qarasaı aýdanynda – 55, Jambyl aýdanynda 40 muǵalimge suranys berilgen.
– Oblysta 21 bilim berý nysanynyń qurylysy júrgizilýde, 20 mekteptiń on jetisi úsh aýysymdy mektepter máselesin sheshýge baǵyttalǵan. Jyl sońyna deıin 13 nysandy paıdalanýǵa berý josparlanǵan, onyń ishinde Kegen aýdanynyń Jalańash aýylyndaǵy mektep 1 qyrkúıekke deıin paıdalanýǵa beriledi. Osy maqsatta bólingen 39 mlrd teńge qarjynyń 5,2 mlrd teńgesi ıgerildi nemese kórsetkishi 13,3 paıyzdy quraǵan. Jańa oqý jylynda 1 300 oryndyq 2 mektep, sondaı-aq 250 oryndyq 2 jekemenshik mektep qoldanysqa beriledi. Qalǵan on mektep jyl sońyna deıin oqýshylarǵa esigin aıqara ashpaq. Munan bólek, 18 bilim berý nysanyna 8,7 mlrd teńgege kúrdeli jóndeý júrgizilip jatyr. Onyń úsheýinde jóndeý jumystary aıaqtaldy, – deıdi oblystyq bilim basqarmasy basshysynyń orynbasary Gúlsara Isaǵulova.
Kúrdeli jóndeý jumysy aıaqtalǵan bilim oshaǵynyń biri – Kegen aýdany, Jalańash aýylyndaǵy J.Ermegııaev atyndaǵy orta mektep. Qazir 940 balaǵa arnalǵan mektepte 245 oqýshy bilim alady eken. Jaqynda Kegen aýdanynyń ákimi Talǵat Baıedilov osy bilim shańyraǵynyń bos turǵan synyp bólmeleriniń negizinde fızıka-matematıka baǵytyndaǵy lıseı ashýdy usynǵan bolatyn. Bul usynys oblystan qoldaý tapqan, ıaǵnı endi aýyl balalary tereńdetilgen bilim alatyn kún alys emes.
Almaty oblysy
