Partııa janyndaǵy Bilim berý jáne densaýlyq saqtaý máseleleri jónindegi respýblıkalyq qoǵamdyq keńestiń tóraǵasy Juldyz Súleımenova saılaýaldy baǵdarlamany iske asyrý aıasynda 2022 jyly 214,5 myń oryndyq 225 jańa mektepti paıdalanýǵa berý josparlanǵanyn habarlady.
«Mektepterdiń jalpy sanynyń 138-i maqsatty qurylys esebinen salynady. Qalǵan 61 mektep – jeke ınvestısııa esebinen turǵyzylady. Bul rette jańa oqý jylynyń qarsańynda 37 myńǵa jýyq orynǵa negizdelgen 81 jańa mektep ashylýǵa daıyn bolýy tıis. Ákimdikter usynǵan málimetke jáne jeke ınvestorlarmen aldyn ala jasalǵan sharttarǵa sáıkes bıyl qyrkúıek aıynda 41 memlekettik jáne 40 jekemenshik mektep paıdalanýǵa beriledi dep josparlanyp otyr», dep habarlady Májilis depýtaty.
Byltyr Partııanyń saılaýaldy baǵdarlamasyn júzege asyrý aıasynda 160 myńnan astam oqýshyǵa arnalǵan 277 jańa mektep ashyldy.
Sonymen qatar partııa shaǵyn qalalardaǵy, aýdan ortalyqtary men aýyldardaǵy mektepterdi jańǵyrtý boıynsha aýqymdy jumys júrgizýde. Depýtattyń aıtýynsha, saılaýaldy baǵdarlamany oryndaý aıasynda jyl saıyn myńǵa jýyq mekteptiń jaǵdaıyn jaqsartý josparlanǵan.
«Búginde 2021-2025 jyldarǵa arnalǵan Jol kartasy bekitildi. Soǵan sáıkes bıyl –1 003 jáne aldaǵy jyldary 994 mektepti jańǵyrtý josparlanǵan. Sonyń nátıjesinde kóp mektep kúrdeli nemese ishinara jóndeýden ótip, jańa jıhazdar alynyp, pándik kabınetter ashylady. Sonymen qatar mektep ashanalary men kitaphanalary jańartylady. Máselen, 900-ge jýyq mektep kitaphanalarynda materıaldyq-tehnıkalyq jabdyqtaýdy jaqsartý jáne qordy kórkem ádebıetpen tolyqtyrý josparlanýda. О́z kezeginde, 450 ashanaǵa jıhaz, asúı tehnıkasy men jabdyqtar satyp alynady. Sondaı-aq tamaqtaný zaldary jóndeledi. Shaǵyn qalalar men aýyldarda oqýshylardyń mektep ishindegi jáne onyń aýmaǵyndaǵy qaýipsizdigin qamtamasyz etý máselesi ózektiligin joıǵan joq. Sondyqtan qazirgi ýaqytta 500-ge jýyq mektepte beınebaqylaýdy, dabyl túımelerin, týrnıketter men kúzet júıesin iske qosý jumysy júrgizilýde», dep atap ótti Juldyz Súleımenova.
Aıta ketý kerek, jańa oqý jylynda 3,6 mln bala men 384 myń pedagogti qamtıtyn 7 700-ge jýyq mektep ashylady. Bul týraly Oqý-aǵartý birinshi vıse-mınıstri Sholpan Karınova partııa alańynda ótken baspasóz máslıhatynda habarlady. Sondaı-aq Sholpan Tańatqyzy aldaǵy oqý jylynda oqýshylardy qandaı jańashyldyqtar kútip turǵanyn baıandady.
«Jańa oqý jylynda balalar 31 mamyrǵa deıin oqıtyn bolady. Sonymen qatar mektep baǵdarlamasyna birqatar ózgeris engizildi. Máselen, aǵylshyn tili endi birinshi emes, úshinshi synyptan bastap oqytylady. Al 1-synypqa «Eńbekke baýlý» jáne «Beıneleý óneri» pánderi engizildi. Bul qadam oqýshylardyń erte kásibı baǵdar jasaýyn qamtamasyz etýge baǵyttalǵan. Jańashyldyqtar oqýshylardyń bilim sapasyn jaqsartýǵa jáne qosymsha mashyqtardy darytýǵa negizdeldi», dedi Sholpan Tańatqyzy.
Sonymen qatar Oqý-aǵartý birinshi vıse-mınıstri ákimdiktermen birlesip sheshilýge tıis máselelerge nazar aýdardy. Sonyń biri – keıbir óńirlerdegi kúrdeli jóndeý jumysynyń merziminen keshigýi bolyp otyr.
«Búginde 261 mektepte kúrdeli jóndeý jumystary júrgizilýde. 1 qyrkúıekke deıin 213 mekteptiń jóndeý jumysyn aıaqtaý josparlanýda. Alaıda 12 óńirde, ásirese Batys Qazaqstan oblysynda – 12, Almaty oblysynda – 5, Túrkistan oblysynda – 4, Jetisý oblysynda – 4, Atyraý oblysynda 3 mekteptiń kúrdeli jóndeý jumysy merziminen keshigýi múmkin. Bul mektepterde jóndeý jumystary jyl sońyna deıin jalǵasady. Osyǵan baılanysty, ákimdikter 48 mektepte oqý jumysyn uıymdastyrý maqsatynda jóndeý jumystary aıaqtalǵanǵa deıin sabaq ótkiziletin oryndardy anyqtap, oqýshylardyń mekteptegi qaýipsizdigin qamtamasyz etýge tıis», dedi vıse-mınıstr.
Jańa oqý jylynda el aýmaǵyndaǵy 900 myńǵa jýyq bala bir rettik tegin tamaqpen qamtamasyz etiletinin atap ótken jón. Al mektepke aparýdy qajet etetin balalar úshin bıyl 515 mektep avtobýsy satyp alyndy. Aıta keteıik, «Mektepke jol» qaıyrymdylyq aksııasy aıasynda 500 myńǵa jýyq bala mektepke daıarlaný úshin qajet kómek alyp jatyr. О́z kezeginde, Amanat partııasy «Balany mektepke daıarlaıyq!» aksııasyn bastady. Esterińizge sala keteıik, atalǵan aksııa aıasynda búkil el boıynsha 30 myńnan astam bala amanattyqtardan jańa oqý jylyna arnalǵan kerek-jaraqtar alady. Iаǵnı baldyrǵandardyń mektep formasy, oqýlyqtar men keńse zattary bar sómkeler beriledi.
