Dana 1999 jyly Almaty qalasynda dúnıege keldi. Bala kezinen salamatty ómir saltyn ustanyp, sý astynda júzý sportymen shuǵyldandy. Bul rette ol nesibesiz bolǵan joq. Birqatar respýblıkalyq jáne halyqaralyq týrnırde jeńis tuǵyryna kóterilip, sport sheberiniń kúmis belgisin keýdesine taqty. Keıinnen djıý-djıtsýǵa den qoıdy. Ýaqyt oza sporttyń bul túrinde de jaqsy nátıjeler kórsete bastady. Elishilik jarystarda aldyna jan salmaı, 2019 jyly Birikken Arab Ámirlikteriniń Dýbaı qalasynda jalaýy jelbiregen jastar arasyndaǵy álem birinshiliginde kúsh synasý qurmetine ıe boldy. Atalǵan básekede Tóleýjan kúmis medaldi moınyna ildi.
Dana Tóleýjan – tek myqty sportshy ǵana emes, sonymen qatar oqý ozaty. Almatydaǵy KIMEP-ti oıdaǵydaı támamdaǵannan keıin Italııanyń astanasy – Rımde ornalasqan Jer-jahandaǵy eń kóne ýnıversıtetterdiń biri – La Sapıensada karjyger mamandyǵy boıynsha magıstratýranyń sońǵy kýrsynda oqyp júr, sporttan da qol úzgen joq. Birqatar halyqaralyq týrnırde mańdaıy jarqyraǵan Dana bıyl da biraz oljaǵa keneldi. Atap aıtsaq, maýsym aıynda Ispanııanyń bas shahary – Madrıdte uıymdastyrylǵan dúbirli dodada altynnan alqa taqty.
Nemis jerinde ótken jarysta 30 memleketten kelgen 400-den asa sportshy baq synady. Olardyń arasynda 18-degi jalyndy jastar da, 50-degi ardagerler de boldy. Qazaqstannan jalǵyz Dana ǵana óner kórsetti. 55 kılo salmaqta kúsh synasqan qandasymyz bastapqy básekelerdiń barlyǵynda qarsylastaryn qapy qaldyryp, jartylaı fınalda ǵana upaı sanymen utyldy. Nátıjesinde, Dana Tóleýjan qola medal ıelendi.
