Altyn belbeý úshin tartys aıaqtalǵan bette dál osy salmaqta kúsh synasyp júrgen qazaqtyń maqtan tutar azamaty Shavqat Rahmonov óziniń ınstagramynda «Oktagonǵa shyqqan sportshylardyń ekeýi de naǵyz chempıonǵa tán jekpe-jek ótkizdi. Leondy jeńisimen quttyqtaımyn. Inshalla, kelesi jyly dál osy belbeý úshin men de talasamyn. Chempıondyq ataqty jańa býynnyń ókilderi ıelene bastaǵany meni qatty qýantady», degen jazba qaldyrdy.
Iá, sol kúndi barsha Alash jurty taǵatsyzdana kútýde. О́ıtkeni áli Qazaqstannyń birde-bir óreni álemdegi eń beldi promoýshenniń chempıondyq belbeýi úshin talasqan emes. Tipti úzdikter sanatyna enýdiń ózi múmkin bolmaı tur. Ázirge eń úzdik kórsetkish dál osy 27 jastaǵy Shavqat Rahmonovqa tıesili. Barlyq 16 kezdesýinde aıqyn jeńiske qol jetkizgen ol 11-oryndy ıelenýde. Jartylaı orta salmaqtyń jańa chempıony – Leon Edvars. Sondaı-aq Kamarý Ýsman (AQSh), Kolbı Kovıngton (AQSh), Hamzat Chımaev (Shvesııa), Gılbert Berns (Brazılııa), Belal Mýhammad (AQSh), Stıv Tompson (AQSh), Shon Bredı (AQSh), Djeff Nıl (AQSh), Horhe Masvıdal (AQSh) jáne Vısente Lýke (Brazılııa) qandasymyzdyń aldyn orap tur. Solardyń bir-ekeýin jaqsylap turyp sabasa, Shavqatqa da chempıondyq táj úshin talasýǵa múmkindik beriletini anyq.
25 kezdesýiniń 24-inde (13 nokaýt) jeńis toıyn toılaǵan Damır Ismaǵulov jeńil salmaqtylardyń reıtınginde 15-oryndy enshileýde. Orynbor oblysynda týyp-ósken 31 jastaǵy qazaqtyń qaısar ulynyń da áleýeti joǵary baǵalanýda. Ár jarysta Damır ortaǵa Reseımen qatar, Qazaqstannyń da týyn ustap shyǵady. Bul salmaqta chempıon joq. Desek te reıtıngte brazılııalyq Charlz Olıveıra kósh bastap tur. 23 qazanda ol óz ataǵyn qorǵap qalý úshin daǵystandyq Islam Mahachevpen kúsh synasady.
Sondaı-aq úzdikter tiziminde amerıkalyq Dastın Pore, Djastın Getjı, Maıkl Chendler jáne Beneıl Darıýsh syndy dúldúlder bar. Dál osy salmaqta Rafael Fızıev 7-satyǵa taban tirep tur. 29 jastaǵy sportshy Ázerbaıjannyń týy astynda atoı salyp júrgenimen, onyń Qazaqstanda týyp-óskenin jankúıerler jaqsy biledi. Jambyl oblysyndaǵy Qordaı aýdanynyń týmasy 13 kezdesýdiń tek bireýinde ǵana jeńilistiń kermek dámin tatty.
О́kinishke qaraı, ózge jerlesterimiz ázirge TOP-15 faıterlerdiń qataryna qosyla almaı otyr. Osy oraıda bizdiń sportshylardyń UFC-de óner kórsetip júrgenderine eki jyldan endi ǵana asqanyn eskergen jón. Sol sebepti de aldaǵy ýaqytta Qazaqstannyń órenderi dúbirli dodalardyń talaıynda daralanatynyna esh kúmánimiz joq.
