Ekspedısııa músheleri buǵan deıingi saparlarynda segiz jarym myń shaqyrymdy eńsergen edi. Elge oralǵan soń olar ekspedısııa barysynda aralaǵan kıeli jerlerden alǵan áserlerimen, ólkemizdiń tarıhyna qatysty jınaqtaǵan aqparattarymen bólisti.
«Bul jolǵy ekspedısııa Batystyń erlik, rýhanı, mádenı baılyǵyn zerdeleýge arnaldy. Maqsat – arnaıy jınaq shyǵaryp, halyqtyń ıgiligine usyný jáne ony jurtshylyqtyń, ásirese jas urpaqtyń patrıottyq sezimin qalyptastyrýǵa paıdalaný. Bizdiń júrgen jolymyz Yrǵyz, Aqtóbe, Beıneý, Mańǵystaý, Atyraý, Oral, odan keıin Qostanaı, Kókshetaýmen aıaqtaldy. Bul joldyń uzyndyǵy 8 myń 500 kılometrdi qurady. Osy joldyń bárin 15 kúnniń ishinde eńserip shyqtyq», deıdi ekspedısııa jetekshisi Murat qajy Ydyrysuly.
Is-shara «Altyn Ordanyń 750 jyldyǵyna, Ahmet Baıtursynulynyń týǵanyna – 150, Mánshúk Mámetova men Hıýaz Dospanovanyń týǵanyna 100 jyl tolýyna oraılastyryldy. Aqtóbe qalasyndaǵy tarıhı-ólketaný mýzeıinde ekspedısııa músheleriniń, aqtóbelik ǵalymdar, tarıhshylar, mýzeı qyzmetkerleri jáne kitaphanashylardyń qatysýymen ǵylymı konferensııa ótti. Jalpy, ekspedısııanyń maqsaty babalar salǵan sara jolmen júrip ótip, tarıhı oryndardy aralaý, kóne qorymdarǵa, arýaqty, bahadúr batyrlar men handardyń, bılerdiń basyna taǵzym etý, kóne qalalardyń oryndaryn zertteý, qazaqtyń azattyǵy úshin bolǵan shaıqas oryndaryna barý, buryn-sońdy ashylmaǵan tyń dúnıelerdi jaryqqa shyǵarý boldy.
«Atalǵan ekspedısııa ári qaraı da óziniń tarıhı-tanymdyq baǵyttaǵy jumystaryn jalǵastyra berýge daıyn», deıdi ekspedısııa jetekshisi Murat qajy Ydyrysuly.
Gákký ASYLBEKQYZY,
«Kókshetaý» gazetiniń bas redaktory
Aqmola oblysy
